Мексикада наркокартел ва полиция тўқнашувида 19 киши ҳалок бўлди

Мексиканинг Синалоа штатида наркокартел ва маҳаллий ҳуқуқ-тартибот идоралари ўртасидаги тўқнашувлар натижасида 19 киши ҳалок бўлди. Бу ҳақда Мексика Миллий мудофаа котибияти (SEDENA) хабар берди.

Департамент маълумотларига кўра, маҳаллий ҳуқуқ-тартибот идоралари операция давомида Мексиканинг Тинч океани жанубий қирғоғи картели фракциясига алоқадор бўлган ячейка раҳбари Эдвин Антониони ҳибсга олган. Операция давомида полицияга наркотик картелининг 30 дан ортиқ аъзоси ҳужум қилган.

"Ҳодиса давомида юқорида тилга олинган 30 дан ортиқ кишининг ҳарбий хизматчиларга ҳужуми қайд этилди... Натижада 19 нафар ҳужумчи ўлдирилди, қолганлари қочиб кетди", дейилади хабарда.

Баёнотда шунингдек, гиёҳванд моддалар картели бошлиғини қўлга олиш чоғида полиция томонидан тўртта пулемёт, битта Барретт М82 йирик калибрли снайпер милтиғи ва еттита автомашина мусодара қилингани қайд этилган.

Мексиканинг Синалоа штати ҳукумати картеллар ўртасидаги кўча жанги ва минтақадаги хавфсизлик амалиётлари туфайли сентябр ойида мамлакат мустақиллик кунларини нишонлашнинг барча тадбирларини бекор қилганди. Маҳаллий оммавий ахборот воситаларининг хабар беришича, Синалоанинг турли ҳудудларида маҳаллий картелнинг икки қаноти – наркобарон Шорти болалари бошчилигидаги Лос Чапитос ва яқинда ҳибсга олинган Исмоил Замбада бошчилигидаги Лос-Майос жангарилари ўртасида тўқнашувлар бўлиб ўтган.

Синалоада тартибни сақлаш учун катта армия контингенти ва миллий гвардия бўлинмалари жойлаштирилди. Мексика мудофаа вазири Луиа Кресенсио Сандовалнинг сўзларига кўра, Кулиакан штати пойтахтида тартибни сақлаш билан турли қуролли кучларнинг 2,2 минг ходими фаолият олиб бормоқда.

Мексиканинг Синалоа штатида жангарилар ва хавфсизлик кучлари ўртасидаги тўқнашувлар натижасида жами 30 дан ортиқ одам, жумладан, икки ҳарбий хизматчи ҳалок бўлди, 30 киши ҳибсга олинди.