Қуролни ихтиёрий топширганлар 5 йилдан бери рағбатлантирилмаяпти
Ички ишлар вазирлиги бу қонунга амал қилмаётганини ҳалигача комиссия тузилмагани билан изоҳлади.
Ўзбекистонда беш йилдан буён қуролни ихтиёрий топширганлар мукофотланмаяпти. Олий Мажлис Қонунчилик палатаси йиғилишида депутат Жаҳонгир Абдурасулов ИИВ расмийларига ўқотар қуролларни ихтиёрий топширганларни рағбатлантириш масаласи билан юзланди.
Депутат 2017 йилдаги "Қурол тўғрисида"ги қонунни эсга олди. Унда ўз ихтиёри билан қуролни топширганлар мукофотланиши мумкин деган тегишли банд киритилган.
ИИВ расмийлари буни рағбатлантириш жараёнининг мураккаб экани ва бунинг унинг махсус комиссия зарурлиги билан изоҳлади.
Депутат Жаҳонгир Абдурасуловнинг таклифига кўра, ИИВ аҳоли топширган қуролларни сотиш имконини яратувчи махсус дўконларни очиши ва уларнинг сотилишини қонуний йўлга қўйиши керак. "Айрим фуқароларга қимматбаҳо қурол мерос қолган бўлиши мумкин ва у ушбу ашёдан фойда олишни кўзлайди. Агар жараён тўғри ташкил этилса, одамлар уйидаги қуролларни ихтиёрий топширади" деди депутат.
