Эски масжид ёнидан яна бир янгиси қуриляпти

“Куз-қиш мавсумида намозхонларга жуда қийин бўляпти. Масжид хонақоҳи 450 кишига мўлжалланган. Жамоат кўп келган вақтда кўпчилик ташқарида қолиб кетади. Ҳовлининг усти ёпиқ бўлса-да, қор ён тарафдан уради. Гиламлар усти билчиллаб кетади. Ёмғир ёққан пайтда кўча кўчадан очиб келган сув масжид ҳовлисида йиғилади. Тўпиғимизгача сувда намоз ўқиган пайтларимиз бўлган”, дейди Мирзо Улуғбек тумани “Шўртепа” маҳалласида жойлашган Мулла Холмирза ота жомеъ масжидига қатновчи намозхонлардан бири.

Бу масжид собиқ Иттифоқ даврида қурилган бўлиб, охирги марта бундан 14 йил муқаддам, яъни 2010 йилда капитал таъмирланган.

Маълум бўлишича, эски масжидни кенгайтириш эса имконсиз бўлиб, муаммоларга ечим топиш мақсадида унинг ёнгинасида ертўла қисми билан қўшиб ҳисоблаганда уч қаватли замонавий масжид барпо этилмоқда.

Биз билан суҳбат чоғида маҳалла нуронийлари бу ишни бошлаган ҳомийлардан жуда миннатдор эканликларини таъкидлашди.