Буюк Британиядаги сайловларда консерваторлар мағлубиятга учради
Бош вазир Риши Сунак мағлубиятни тан олди. Энди лейбористлар ҳокимиятни эгаллаши кутилмоқда.
Буюк Британияда сэр Кей Стармер бошчилигидаги Лейбористлар партияси муддатидан олдин парламент сайловлари натижаларига кўра Вакиллар палатасида кўпчилик овозларни қўлга киритди.
Бу Буюк Британияда 14 йиллик консерватив бошқарувнинг тугашини англатади.
Барча сайлов округларида саноқлар ҳали якунлангани йўқ, аммо лейбористлар аллақачон уларнинг 347 тасида расман ғалаба қозониб, 650 ўринли палатада оддий кўпчиликни ташкил қилган. Пайшанба оқшомида овоз бериш тугагандан сўнг дарҳол эълон қилинган экзит-полл прогнозига кўра, лейбористлар 410 ўринга эга бўлади.
Маълумки, Кей Стармер ва бўлажак ҳукуматда иккинчи муҳим лавозимга номзод бўлган сояли молия вазири Рейчел Ривз ўз сайлов округларида ишончли ғалаба қозонишган.
Натижалар эълон қилингандан сўнг, Стармер қисқача нутқида, қисман шундай деди: "Ўзгаришлар айнан шу ерда бошланади, чунки бу сизнинг демократиянгиз, сизнинг жамиятингиз, келажагингиз. Сиз овоз бердингиз. Ваъдаларимизни бажариш вақти келди".
Амалдаги бош вазир Риши Сунак ҳам ўз сайлов округидаги Ричмонд ва Норталлертондаги сайловларда ғалаба қозонишга муваффақ бўлди. Шу билан бирга, у консерваторлар мағлуб бўлганини тан олди ва Стармерни ғалабаси билан табриклашини айтди.
“Бугун ҳокимиятнинг қўлдан қўлга ўтиши тинч ва осойишта, ҳар томондан хайрихоҳлик билан ўтади. Бу барчамизда мамлакатимиз барқарорлиги ва келажагига ишонч уйғотиши керак. Британия халқи бугун ақл бовар қилмайдиган ҳукм чиқарди, ўрганиш керак бўлган кўп нарса бор... ва муваффақиятсизлик учун жавобгарликни ўз зиммамга оламан", деди Сунак.
Эслатиб ўтамиз. Риши Сунак мамлакатни 2012 йилдан бери бошқариб келади.
