4 та ҳудудда солиқчилар пора билан қўлга тушди

Давлат хавфсизлик хизмати ходимлари Бухоро, Қашқадарё вилоятлари ва Тошкент шаҳрида махсус тадбир ўтказиб, солиқ ходимларини пора устида қўлга туширди.

Хусусан, Қарши тумани солиқ инспекциясининг сайёр солиқ текширувлари шуъбаси бош инспектори маҳаллий 5 та МЧЖ фаолияти юзасидан жорий йилнинг сентябр ойига қадар камерал солиқ текширувлари ўтказмаслик эвазига 2300 доллар олган вақтида ашёвий далиллар билан ушланди.

Шунингдек, у бу пулни вилоят солиқ бошқармасининг камерал солиқ текширувлари шуъбаси бош инспекторига бериши кераклиги аниқланиб, тезкор тадбир давом эттирилди ҳамда мазкур мансабдор шахс ҳам 2300 АҚШ долларини олган вақтида ушланди.

Ғиждувон тумани солиқ инспекцияси катта инспектори туман марказидаги “Ҳўжаи жаҳон” савдо комплекси ҳудудида фаолият юритувчи якка тартибдаги тадбиркорни жорий йилнинг охирига қадар айланма солиқ тўловчиси тоифасидан, ҳар ойда 2 млн. 424 минг сўм тўлайдиган қатъий турдаги солиқ тўловчиси тоифасига ўтказмаслик, келгусида солиқ идоралари томонидан бўладиган текширувлардан ҳимоя этиш ҳамда унинг фаолиятига раҳнамолик қилиш эвазига 8 млн. сўм олган вақтида ушланди.

Яккасарой туманида жойлашган умумий овқатланиш масканида 6 ой мобайнида солиқ текширувлари ўтказмаслик, аксинча, унинг фаолиятига раҳнамолик қилиш эвазига 600 доллар олган вақтида ашёвий далиллар билан ушланди. Шунингдек, терговга қадар текширув давомида, ушбу ноқонуний ишга туман солиқ инспекциясининг шуъба бошлиғининг алоқадор эканлиги аниқланиб, у ҳам процессуал тартибда ушланди.

Тошкент вилоятининг Юқори Чирчиқ туманидаги МЧЖ фаолияти бўйича ўтказилган солиқ аудити текшируви натижасида аниқланган 267 млн. 300 минг сўм қўшилган қиймат солиғи ва 664 млн. 700 минг сўм соф фойда солиғини мансабдор танишлари орқали камайтириб бериш эвазига 5 минг доллар олган вақтида мазкур туман солиқ инспекциясининг камерал назорат шуъбасининг собиқ бошлиғи ушланди.

Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.