“Термиз халқаро савдо маркази”да хорижий валюталарда ҳам савдо қилинади
Марказ фаолияти билан боғлиқ вазиятларда Афғонистон ва Покистон фуқароларига ҳам бир қатор имкониятлар берилади.
“Термиз халқаро савдо маркази” эркин савдо зонасида улгуржи ва чакана савдо учун тўлов сифатида АҚШ доллари, евро, рубл ва юан валюталарини қабул қилишга рухсат берилади.
Президент 2024 йил 13 май куни “Термиз халқаро савдо маркази” эркин савдо зонаси фаолиятини йўлга қўйиш ва ривожлантириш бўйича қўшимча чора-тадбирлар тўғрисида”ги қарорни имзолади.
Унга кўра, ушбу марказ ҳудудида фаолият юритувчи, Ўзбекистонда рўйхатга олинган тадбиркорларга Афғонистон, чет эл фуқаролари ва фуқаролиги бўлмаган шахсларни меҳнат фаолиятини амалга ошириш ҳуқуқи учун тасдиқнома олмасдан меҳнат шартномалари асосида ишга қабул қилишга рухсат берилади.
Қарорда, шунингдек, марказ фаолияти билан боғлиқ вазиятларда Афғонистон ва Покистон фуқароларига бошқа бир қатор имконият ва эркинликлар бериш ҳам белгилаб қўйилган.
