Тошкентда уй-жой ижараси нархи тушиши давом этмоқда
Нисбатан арзон нархлар Сергели ва Олмазор туманларига, қимматлари эса Яккасарой ва Миробод туманларига тўғри келмоқда.
![Тошкентда уй-жой ижараси нархи тушиши давом этмоқда](https://cp.platina.uz/media/CACHE/images/227553_original.53a6501e8f55.webp)
Ўзбекистон пойтахти Тошкентда ижара нархларининг пасайиши кузатилмоқда. 2024 йилнинг февраль ойида Тошкент шаҳрида таклиф этилган уй-жой ижара нархларини таҳлил қилинди.
Тошкент шаҳрида ижара нархлари пасайишда давом этмоқда. 2024 йил февраль ойида пойтахтда ўртача таъмирланган туркумдаги хонадонлар ижара нархларида январь ойига нисбатан ўртача 0,34%га, тўлиқ таъмирланган туркумдаги уй-жойлар ижара нархларида эса ўртача 0.13%га тушиш кузатилди.
Ўртача таъмирланган уй-жой ижараси. 2024 йил февраль ойида ушбу синфдаги 1 хонали хонадонлар учун таклиф этилган ижара нархлари ўтган январь ойига нисбатан ўртача 0.3% га пасайиб, 394 долларни ташкил этган бўлса, 2 хонали хонадонлар ижара нархлари эса 0,2% га арзонлаб, ўртача 441 долларгача тушди. Шунингдек, ўртача таъмирланган 3 ва 4 хонали уйлар ижара нархлари 0.4% га пасайиб, ўртача нархлар мос равишда 514 ва 594 долларни ташкил этди.
Ўртача таъмирланган туркумдаги уйлар учун нисбатан арзон ижара нархлари Сергели (1 хонали - $358, 2 хонали - $393, 3 хонали - $435, 4 хонали - $450), Олмазор (1 хонали - $357, 2 хонали - $415, 3 хонали - $455, 4 хонали - $490) туманларида таклиф этилган бўлса, ушбу туркумдаги энг қиммат ижара нархлари Яккасарой (1 хонали - $420, 2 хонали - $488, 3 хонали - $657, 4 хонали - $738) ва Миробод (1 хонали - $467, 2 хонали - $520, 3 хонали - $620, 4 хонали - $832) туманларида кузатилди.
Маълумот учун: 2023 йил ноябрь ойидан 2024 йил февраль ойигача бўлган даврда ўртача таъмирланган 1 ва 2 хонали уйлар учун ўртача ижара нархлари мос равишда 1,8% ($401 дан $394га) ва 2,4%га ($452 дан $441га) тушган.
Тўлиқ таъмирланган уйлар ижара нархлари. Февраль ойида тўлиқ таъмирланган 1 хонали уйлар учун ўртача ижара нархлари $475 ни ташкил этиб, ўтган январь ойига нисбатан 0.3%га тушган бўлса, 2 хонали уйлар учун ушбу кўрсаткичлар мос равишда $651 ва 0.6% ни ташкил этган. Шунингдек, 3 хонали уйлар учун таклиф этилган ўртача ижара нархларида ($790) ҳам бироз (0,1%) тушиш кузатилди.Лекин, тўлиқ таъмирланган 4 хонали уйлар ўртача ижара нархлари 0.4% ошиб, $919 гача кўтарилган.
Тўлиқ таъмирланган туркумдаги уйлар учун энг арзон ижара нархлари Сергели (1 хонали - $393, 2 хонали - $462, 3 хонали - $560, 4 хонали - $761) ва Учтепа (1 хонали - $401, 2 хонали - $498, 3 хонали - $617, 4 хонали - $850) туманларида ҳамда ушбу туркумдаги энг қиммат ижара нархлари Шайхонтоҳур (1 хонали - $555, 2 хонали - $848, 3 хонали - $1057, 4 хонали - $1028) ва Миробод (1 хонали - $570, 2 хонали - $861, 3 хонали - $1024, 4 хонали - $1128) туманларида кузатилди.
Эслатиб ўтамиз, 2023 йилнинг октябр ойида ҳам пойтахтда барча турдаги хонадонлар учун таклиф этилаётган ижара нархлари ўтган йилнинг мос давридагига нисбатан арзонлашган. Ўшанда нархлар ўртача 6-14 фоизгача тушганди.