Суриядаги жангларда қатнашган андижонлик ушланди

Жиноят ишлари бўйича Андижон шаҳар судининг ҳукмига кўра, “Тавҳид ва жиҳод катибаси” террор ташкилоти фаолиятида қатнашган фуқаро Жиноят кодексининг 155-2 ва 244-2-моддалари билан айбли деб топилиб, 10 йил 1 ой муддатга озодликдан маҳрум этилган.

Андижон шаҳрида яшовчи шахс 2017 йилнинг июнь ойида ишлаш учун Туркиянинг Истанбул шаҳрига бориб, савдо дўконида сотувчилик билан шуғулланган. Орадан бир йил ўтиб, унинг олдига акаси боргач, улар бирга ишлай бошлашган.

Лекин диний мутаассибликка берилган ака ўз укасини тўғри йўлдан адаштириб, унга террорчилик ташкилотлар ва диний экстремистик оқимларнинг ғоявий раҳнамолари бўлган Содиқ Самарқандий, Абдуллоҳ Зуфар, Абдуллоҳ Бухорийнинг маърузаларини тарғиб қилган, Сурияга бориб, жиҳод қилиш лозимлигини айтган.

2018 йилнинг куз ойларида аввал ака, кейинроқ ука Суриядаги террор ташкилоти сафига қўшилган. Лекин қуролли тўқнашувлар вақтида ака ҳалок бўлган.

Ўша пайтлари террор ташкилотлари ўртасида юзага келган келишмовчиликлар, амир бўлиш учун етакчиларнинг ўзаро низоларини кўриб, ҳафсаласи пир бўлган ука онаси юборган пуллар ёрдамида Туркияга қайтган.

Кейинроқ бир муддат Қирғизистонда, сўнгра Қозоғистонга борган ва бу давлатнинг сохта фуқаролик паспортини олган. У ҳужжатни қалбакилаштиргани учун ушланиб, жиноий жавобгарликка тортилган.

Жазо муддатини ўтаб бўлгач, Ўзбекистонга депортация қилинган. Бу ерда эса Суриядаги ҳаракатлари учун қамалган.