Россия Киевга ракеталар ёғдирди, 53 киши жабрланган
Шаҳар мэри Виталий Кличко аҳвол бўйича баёнот берди.
Киев мэри Виталий Кличконинг айтишича, Россия армиясининг шаҳарга тунги ракета ҳужуми натижасида 53 киши жароҳатланган, улардан 20 нафари касалхонага ётқизилган.
Ракета қолдиқлари йўл қисмига тушиши натижасида сув таъминоти тармоғи шикастланган. Бундан ташқари, Киевнинг Днепр туманида ҳужум пайтида кўп қаватли уй зарар кўрган, хусусий уйлардан бирида ёнғин содир бўлган.
Украина Қуролли кучлари ҳаво ҳужумидан мудофаа кучлари Киев осмонида ўнта С-400 ва “Искандер” ракеталари ҳамда ўнта “Шаҳед” учувчисиз учоқларини уриб туширганини очиқлади. Россия эса фақат ҳарбий инфратузилма ва ҳарбий мақсадларда фойдаланиладиган инфратузилма обектларида ўққа тутилаётгани иддао қилиб келади.
Украина расмийлари Киевга ҳужум ҳақида охирги марта 11 декабр куни хабар берган эди. Украина Қуролли кучлари Ҳарбий ҳаво кучлари қўмондонлиги шундан сўнг ҳаво ҳужумидан мудофаа кучлари шаҳар узра саккизта баллистик ракета ва 18 та учувчисиз самолётни уриб туширишга муваффақ бўлганини маълум қилди.
Виталий Кличконинг сўзларига кўра, пойтахтда вайроналарнинг қулаши натижасида тўрт киши жабрланган.
Эслатиб ўтамиз, аввалроқ Харков вилоятидаги ракета зарбаси туфайли 50 дан ортиқ киши ҳалок бўлганди.
