Заправкалардаги чекловга изоҳ берилди

Энергетика вазирлиги матбуот хизматининг Platina.uz сайтига маълум қилишича, заправкалардаги чекловлар газ йўқлигидан эмас, босим камлиги, юклама кўплиги билан боғлиқ.

"Газ заправкаларда лимит бўйича чеклов йўқ. Фақат бир нарсани тушунишингларни истардик: оддий истеъмолчи, яъни сизу биз ҳам, ижтимоий соҳа объектлари, яъни мактаблар, касалхоналар, болалар боғчаларини иситишга хизмат қилувчи иссиқлик марказлари ҳам, тадбиркорлик субъектлари ҳам, электр энергияси ишлаб чиқариб, бизга етказиб берадиган электр станциялари ҳам, метан заправкалар ҳам битта катта қувурдан келаётган табиий газни олади. Ҳаммаси баравар ишлаган маҳалда уларнинг ҳар бирида ўз-ўзидан босим пасайиши турган гап", деди вазир матбуот котиби Ҳасан Тошхўжаев.

Унинг қўшимча қилишича, биринчи навбатда аҳоли ҳамда ижтимоий соҳа объектларини, қолаверса, электр станцияларни табиий газ билан узлуксиз ва барқарор таъминлаш мақсадида сутканинг эҳтиёж ўта ортган вақтларида айрим чекловларни киритишга тўғри келмоқда.

Эслатиб ўтамиз, газ заправкалари фаолияти аввалига 06:00-15:00 гача, бугундан эса 06:00-12:00 гача қисқартирилган эди.