Эрон президенти Раисий Путиннинг олдига боради
Ғазо масаласи музокараларда муҳим мавзу бўлиши кутилмоқда.
Эрон президенти Иброҳим Раиси бугун, 7 декабр куни Россия президенти Владимир Путин билан учрашиш учун Москвага йўл олмоқда.
Учрашув Путиннинг шу ҳафтада БАА ва Саудия Арабистонига сафари ортидан ўтказилади.
Россия давлат ОАВларига кўра, Эрон раҳбари савдо-иқтисодий ҳамкорликни муҳокама қилиш учун Москвага кетмоқда. Эроннинг Tasnim нашри хабарига кўра, Ғазо Россия-Эрон музокараларида муҳим мавзу бўлиши кутилмоқда.
“Россия президенти Владимир Путин 7 декабр куни Москвада Россияга амалий ташриф билан келган Эрон Ислом Республикаси президенти Иброҳим Раиси билан музокаралар ўтказади”, — дейиладиТАСС хабарида. – Икки томонлама ҳамкорликнинг жорий кун тартибини мазмунли кўриб чиқиш, асосий эътиборни савдо-иқтисодий соҳада, жумладан, транспорт ва энергетика соҳасида қўшма истиқболли лойиҳаларни амалга оширишга қаратиш режалаштирилган".
Икки давлат раҳбарлари охирги марта 2022 йил Самарқанддаги ШҲТ саммитида учрашишганди.
Эслатиб ўтамиз, Эрон Украинага қарши урушда Россияга дронлар етказиб беришда айбланади (Эрон томони буни инкор қилиб келади). Шунингдек, ҲАМАС ҳаракати ҳам бевосита расмий Теҳрон томонида қўллаб-қувватланиши айтилади. Айрим нашрларга кўра, Раисий ва Путин урушлар ва қурол-яроқ масаласида ҳам гаплашиб олиши кутиляпти.
