Сирдарёда жамоат транспорти нархи икки баробарга ошди
Қарор 4 декабрдан кучга кирди.
Гулистон, Ширин ва Янгиер шаҳарларида жамоат транспорти нархи ўзгаради ва янги, рағбатлантирувчи ва қўшимча тарифлар жорий этилади. Жумладан, Гулистонда нархлар аввалги 1000 сўмдан 2000 сўмгача кўтарилди.
Вилояти ҳокими қарорига кўра нархлар қуйидагича:
— бир йўловчи учун нақд пул ёки банк карталари орқали тўлов қилинган 2000 сўм;
— АТТО карталаридан тўлов қилинганда бир марталик рағбатлантирувчи нарх — 1500 сўм;
— бир йўловчининг багажини ташиш нархи 2000 сўм;
— қатновлар сонига боғлиқ ҳолда белгиланган тариф режаларини ҳисоблаш учун чекланган тариф 1500 сўм.
Шаҳар атрофида бир йўловчи километр учун тавсиявий нарх:
— автобусларда 150 сўм;
— йўналишли таксиларда 200 сўм этиб белгиланди.
Ушбу қарор эълон қилинган сана (2023 йил 4 декабр)дан кучга кирди.
