Зироат Мирзиёева Ғазодаги жанговар ҳаракатларни тўхтатишга чақирди

Ўзбекистон биринчи хоними ҳудуддаги аҳолига гуманитар ёрдам етказиш учун имконият яратиш лозимлигини ҳам айтган. 

Сиёсат
16 ноябрь 2023 йил
Зироат Мирзиёева Ғазодаги жанговар ҳаракатларни тўхтатишга чақирди

Ўзбекистон Биринчи хоними Зироатхон Мирзиёва Туркиянинг Биринчи хоними Эмине Эрдўғоннинг таклифига биноан 15 ноябрь куни “Фаластинда тинчлик учун биргаликда” саммитида иштирок этди. Унда Зироат Мирзиёева ҳар икки томонни ҳам зудлик билан ўт очиш ва жанговар ҳаракатларни тўхтатишга, танг аҳволда қолган аҳолига гуманитар ёрдам етказиш учун имконият яратишга, низони фақатгина тинч, дипломатия йўли билан "икки халқ учун икки давлат" тамойили асосида ҳал этишга чақириб, Ўзбекистоннинг бу борадаги қатъий позициясини яна бир бор билдирди.

Учрашув Ғазодаги тинч аҳолининг азоб-уқубатларига чек қўйиш ва Фаластин-Исроил низосига ечим топиш йўлида қатъий бирдамликни намойиш этиш мақсадида ташкил этилди.

"Минг афсуски, халқаро ҳамжамиятнинг кучли эътирози ва босимига қарамай, ҳалокат ва вайронагарчилик кўлами мисли кўрилмаган даражада ортиб, унинг охири сира кўринмаяпти. Натижада қуролли тўқнашувларга минтақадаги янги кучларнинг тортилиш эҳтимоли тобора кучаймоқда...

Ўзбекистон халқи Фаластиннинг тинч аҳолиси бошига тушган кулфат ва қайғу-аламларни юракдан ўтказмоқда", - дея маълум қилган Ўзбекистоннинг Биринчи хоними.

Эслатиб ўтамиз, Ўзбекистон президенти Шавкат Мирзиёев ҳам мамлакат Фаластин халқи билан бирдамлигини айтиб, БМТнинг Яқин Шарқ бўлимига 1,5 млн. доллар ажратганди. 

© 2023 Platina.uz. Барча ҳуқуқлар ҳимояланган. «Platina.uz» сайтида жойланган маълумотлар муаллифнинг шахсий фикри. Сайтда жойланган ҳар қандай материаллардан ёзма рухсатсиз фойдаланиш тақиқланади.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 02.12.2022 санасида №051412 сонли гувоҳнома билан ОАВ сифатида рўйхатга олинган.
Platina.uz сайтида реклама жойлаштириш масаласида +998 97 022 01 10 телефон рақамига (Telegram: Platina PR) мурожаат қилинг. Таҳририят билан алоқа: info@platina.uz
18+