Андижонда аҳолига бериладиган кўмирлар талон-торож қилинди

“Кўмир таъминот” МЧЖнинг Андижон вилояти филиали тасарруфидаги 3 та кўмир омбори раҳбарлари куз-қиш мавсумида аҳолига имтиёзли нархда тарқатишга мўлжалланган кўмирларни гўёки фуқаролар олгани ҳақида сохта маълумотлар тайёрлаб, нақд пулга сотишиб, шахсий манфаатлари йўлида талон-торож қилишган.

Хусусан:

• Андижон тумани кўмир омбори мудири Ш.Б. 362,3 млн. сўмлик 1.220,0 тонна;
• Булоқбоши тумани кўмир омбори мудири С.Н. 178,3 млн. сўмлик 445,5 тонна;
• Жалақудуқ тумани кўмир омбори мудири Й.Ю. 421,7 млн. сўмлик 1.419,9 тонна.

Мазкур ҳолатлар юзасидан омбор мудирларига нисбатан ЖКнинг 167-моддаси 3-қисми “а” банди ва бошқа моддалари билан жиноят ишлари қўзғатилиб, улар Жиноят-процессуал кодексининг 221-моддаси тартибида ушланган.

Жиноят ишлари юзасидан дастлабки тергов ҳаракатлари Андижон вилояти прокуратураси томонидан олиб борилмоқда.