Камар тақмаганлар ҳам энди камерага тушади

Эндиликда кузатув камералари ҳаракат вақтида хавфсизлик камарини тақмаган ҳайдовчиларни ҳам қайд этади.

Бу ҳақда Ички ишлар вазирлиги жамоат хавфсизлиги департаменти йўл ҳаракати хавфсизлиги хизмати маълум қилди.

Қоидаларга кўра машина бошқараётган ҳайдовчи ва унинг олд ўриндиғидаги йўловчилар ҳаракатни бошлашдан олдин хавфсизлик камарларини тақиб олишлари шарт.

Камар тақмаганларга жарима миқдори БҲМнинг 50 фоизи, яъни 165 минг сўмни ташкил этади.

Олд ўриндиқдаги йўловчилар ҳам камар тақиши белгиланган, аммо уларга қайси асос билан жарима қўллаш ҳалигача тўлиқ ҳал этилмаган.