Илон Маскнинг Зеленский ҳақидаги меми катта можарога айланмоқда

Украина президенти девони раҳбари маслаҳатчиси Михаил Подоляк америкалик тадбиркор Илон Маскни Россияни қўллаб-қувватлашда айблади. Илон Маск X (собиқ Твиттер) тармоғида Украина президенти Владимир Зеленскийнинг Ғарб ёрдамига қарамлигини масхара қилган.

“Бугунги кунда Украина бўйича ҳар қандай сукунат ёки киноя Россия томонига сўзсиз далдадир”, — деб ёзди Михаил Подоляк ўзининг Телеграм-каналида.

Эслатиб ўтамиз, бу Илон Маскнинг Украина борасида биринчи зиддиятли баёноти эмас. Аввалроқ у Украинанинг шарқий ҳудуди асосан рус тилида мулоқот қилишига ишора қилиб, уларга танлов эркинлиги беришни айтганди.

Шунингдек, у Қримга ҳужум қилишга ҳозирланган Украина кучларига Starlink маълумотларидан фойдаланиш имкониятини ҳам тақдим этмаган.