Қорабоғ масаласи: ўт очиш тўхтатилади, ҳудуд Озарбайжонга интеграция қилинади
19 сентябр куни Озарбайжон мудофаа вазирлиги Қорабоғда ҳарбий операция бошлаганди.
Озарбайжоннинг Қорабоғ ҳудудидаги тан олинмаган республика расмий Боку билан музокараларга киришишини эълон қилди.
Унда айтилишича, музокаралар 21 сентябр куни Евлах шаҳрида ўтказилади.
Шунингдек, ҳудуддаги арман қўшинлари қуролсизлантирилади, оғир техникалар олиб чиқилади. Музокараларда Қорабоғни Озарбайжонга интеграция қилиш, маҳаллий арманларнинг хавфсизлигини таъминлаш масалалари кўрилади.
Эслатиб ўтамиз, 19 сентябр куни Озарбайжон мудофаа вазирлиги Қорабоғда аксилтеррор операция ўтказилишини эълон қилганди. Операция давомида тан олинмаган Қорабоғ ҳудудидаги нишонларга зарба берилди.
Тан олинмаган республика расмийлари иддаосига кўра, операция натижасида 32 киши ҳалок бўлди.
