Эрдўғон Туркиянинг Европа Иттифоқига аъзолиги бўйича кескин гапирди

Туркия президенти Ражаб Тоййиб Эрдўғон Aнқара ва Европа Иттифоқи турли йўллардан бориши мумкинлигини айтди. Бу ҳақда сиёсатчи БМТ Бош ассамблеяси йиғилишида иштирок этиш учун Нью-Йоркка учиши олдидан Истанбулдаги матбуот анжуманида гапирди, деб ёзади Anadolu.

"Менинг фикримни жуда аниқ билмоқчи бўлсангиз, Европа Иттифоқи Туркиядан узоқлашишга интилмоқда. У Туркиядан ажралиш учун қадам ташлаётган бу даврда, биз ҳам ўз қарорларимизни эълон қиламиз. Бу қарорлар оқибатида йўлларимиз Европа Иттифоқи билан бутунлай ажралиб кетиши мумкин", деди Эрдўғон.

Ушбу кескин баёнот Европарламентнинг яқинда эълон қилинган танқидий ҳисоботига жавобан берилган, унда Туркиянинг Европа Иттифоқига қўшилиш жараёни ҳозирги шароитда қайта тиклана олмаслиги таъкидланганди.

Туркия 24 йил давомида Европа Иттифоқига аъзоликка расмий номзод бўлиб келган, бироқ сўнгги йилларда аъзолик бўйича музокаралар тўхтаб қолган.

Эрдўғон аввалроқ Ғарб 50 йилдан бери Туркияга берган ваъдасида турмаётганини айтганди.

Шунингдек, Эрдўғон Украина можароси ҳақида гапираркан, уруш ҳали-вери тугамаслигини маълум қилди. Унинг фикрича, "уруш тез тугашини билдирадиган белгилар умуман йўқ".