Бир гуруҳ жангарилар Афғонистондан Тожикистон чегарасини бузиб кирди

Афғонистондан Тожикистонга ўтиб, мамлакат мустақиллиги кунида теракт тайёрлашга уринган жангари гуруҳ йўқ қилинди. Бу ҳақда тожик ОАВлари мамлакат миллий хавфсизлик қўмитасига асосланиб хабар бермоқда. 

Жорий йилнинг 30 августига ўтар кечаси халқаро террорчилик ташкилотининг уч нафар аъзоси Дарваз йўналишидаги Кеврон аҳоли пункти ҳудудида тожик-афғон чегара чизиғини ноқонуний кесиб ўтган.

“Уларнинг мақсади давлат мустақиллиги куни арафасида Тожикистон ҳудудида террорчилик ҳаракатини амалга оширишдир”, дея хабар қилган мамлакат Миллий хавфсизлик қўмитаси.

Ҳужумга уриниш олдиндан маълум бўлган, террорчиларнинг жойлашуви ва ҳаракатланиш йўллари кузатувга олинган, улар қуршаб олинган.

“5 сентябр куни эрталаб Миллий хавфсизлик давлат қўмитасининг аксилтеррор гуруҳи жангарилар турган жойни ўраб олди ва таслим бўлишни талаб қилди. Террорчилар талабга жавоб бермади ва биринчи бўлиб қуролларидан ўқ узди. Шундан сўнг, аксилтеррор операцияси натижасида террорчилик гуруҳининг уч нафар аъзоси йўқ қилинди”, — дейилади хабарда.

Жангарилар ёнидан қуроллар, ўқ-дорилар ва пул топилган. Улар "Жамоати Ансорулло" ташкилоти аъзолари экани маълум қилинди.