Журналистлар учун миллий маъруза тайёрланяпти

Журналистика соҳасида турган вазифаларни аниқ белгилаб олиш ва амалга оширишда ҳозирги вақтда Журналистлар уюшмаси томонидан Миллий маъруза тайёрланмоқда.

Бу ҳақда президент Шавкат Мирзиёев Матбуот ва оммавий ахборот воситалари куни муносабати билан йўллаган табригида маълум қилган.

"Биз мамлакатимизда сўз ва матбуот эркинлигини, ахборот олиш ва уни тарқатиш ҳуқуқини таъминлаш масаласини инсон қадрини улуғлаш, демократик жамият ва халқпарвар давлат қуришга қаратилган тараққиёт стратегиямизнинг муҳим ва ажралмас қисми деб биламиз", дея таъкидланади давлат раҳбари табригида.

Президент, шу билан бирга, "ер юзининг турли бурчакларида юз бераётган, барчамизни ташвиш ва хавотирга солаётган воқеалар"ни тилга олган.

"Айрим минтақа ва ҳудудларда оммавий ахборот воситалари муайян сиёсий кучлар қўлида информацион урушни авж олдиришга, жамоатчилик фикрини чалғитишга, оқни – қора, қорани – оқ деб кўрсатишга хизмат қилаётганини афсус билан қайд этиш лозим", дейилади табрик матнида.

Шавкат Мирзиёев ОАВни изчил ривожлантириш бундан буён ҳам эътибор марказида бўлиб қолишини маълум қилган.

Аввалроқ, байрам муносабати билан бир гуруҳ журналистлар тақдирлангани хабар берилганди.