Ўзбек-қозоқ чегарасида муаммо қолмади

Ўзбек-қозоқ чегарасидаги муаммолар ҳал қилинди,  демаркация бўйича қонун маъқулланди. 

Сенатнинг қирқ иккинчи ялпи мажлисида  Ўзбекистон ва Қозоғистон ўртасидаги чегарани демаркация қилиш бўйича қонун кўриб чиқилди.

Ҳужжат Ўзбекистон  раҳбари Шавкат Мирзиёев ва Қозоғистон президенти Қосим-Жўмарт Тўқаев томонидан унинг 2022 йил 21 декабр куни Ўзбекистонга давлат ташрифи чоғида имзоланганди. 

Шартномага кўра Ўзбекистон ва Қозоғистон ўртасидаги Давлат чегарасининг демаркация қилинган чизиғи узунлиги 2 356 километрдан ортиқдир.

Шартнома билан Ўзбекистон-Қозоғистон Давлат чегарасини белгилаш бўйича ишлар тўлиқ якунланди.

Якунда қонун сенаторлар томонидан маъқулланди.

Эслатиб ўтамиз, Ўзбекистон ва Қозоғистон ўртасидаги чегара узунлиги 2 356 километрни ташкил этади.

Шунингдек, Ўзбекистон йил бошида Қирғизистон билан давлат чегарасини делимитация қилиш жараёнини якунлаганди.

Маълумот ўрнида: чегарани делимитация қилиш — қўшни давлатлар ўртасидаги давлат чегарасини музокаралар йўли билан аниқлаш, демаркация эса жойлардаги чегара чизиғини махсус белгилар (тўсиқлар) билан белгилашдир.