Тошкент ҳокимлигига 100 млрд. ссуда берилди
“2023-2024 йилларда Тошкент шаҳрининг Шайхонтоҳур туманини ижтимоий-иқтисодий ривожлантириш ва маҳаллалар инфротузилмасини яхшилашга доир қўшимча чора-тадбирлар тўғрисида”ги президент қарори имзоланган.
Тошкент шаҳар ҳокимлигига Шайхонтоҳур туманида “Туризм халқаси”ни ташкил этиш учун республика бюджетидан маҳаллий буджетга 3 йил муддатга 100 млрд. сўм ссуда берилган.
7 июнда “2023-2024 йилларда Тошкент шаҳрининг Шайхонтоҳур туманини ижтимоий-иқтисодий ривожлантириш ва маҳаллалар инфротузилмасини яхшилашга доир қўшимча чора-тадбирлар тўғрисида”ги президент қарори имзоланган.
Қарорга кўра:
- 2023-2024 йилларда Шайхонтоҳур туманида 2 минг ўринли 8 та замонавий меҳмонхона ташкил этиш;
- 2023 йил декабргача “Чорсу” ва “Эски жува” бозорларини тартибга келтириш ва сотувчиларга зарур шарт-шароитларни яратиш;
- 2023 йил ноябргача Оқ тепа канали ҳамда Лабзак ва Ўрда маҳаллаларидан оқиб ўтувчи Анҳор бўйи кўчасидаги канал бўйида сайилгоҳ ташкил этиш;
- 2024 йил июлгача Шайхонтоҳур тумани ҳудудида мавжуд бўлган тарихий дарвозаларни тиклаш;
- 2023 йил октябргача Абдулла Қодирий кўчасида барпо этилган сайилгоҳ қисмларини боғловчи пиёдалар кўпригини барпо этиш;
- 2023 йил июлгача Абдулла Қодирий кўчасидаги сайилгоҳни хусусий бошқарувга бериш;
- 2023 йил ноябргача Гулбозор маҳалласида Тошкентнинг қадимги тарихий кўринишини сақлаб қолган ҳолда туризм кўчасини ташкил этиш;
- 2024 йилгача Самарқанд дарвоза кўчасидан ўтган Жанггоҳ, Чуқуркўприк ва Захариқ коллекторларини тупроқ билан тўлдириш, пайдо бўлган бўш ер майдонларини аукцион орқали савдога чиқарган ҳолда кўнгилочар кўчалар, ресторанлар, савдо-хизмат кўрсатиш объектларини ташкил этиш белгиланган.
