Месси "ПСЖ"дан Саудия Арабистонига рухсатсиз боргани учун кечирим сўради

Аввал хабар қилганимиздек, "Пари Сен-Жермен" футбол жамоаси раҳбарияти супер юлдуз ҳужумчи Лионел Мессини икки ҳафтага ўйиндан четлатган эди. Месси клуб рухсатисиз Саудия Арабистонига реклама сафарига чиққани учун шундай қарор қабул қилинган. 

"ПСЖ" жамоаси якшанба куни ўз уйида "Лорьян"дан 3:1 ҳисобида мағлуб бўлганидан сўнг, 35 ёшли футболчи Саудия Арабистонига учиб кетган. Бу ерда футбол юлдузи расман “туризм элчиси” ҳисобланади.

Кейинчалик эса ПСЖ Месси билан шартномани бошқа узайтирмаслик ҳақида қарор қабул қилшгани маълум бўлди.

Шундай можаролар фонида Месси ўзининг Instagram саҳифасига узр сўраб, видеомурожаат юклади. Италиялик машҳур спорт журналисти Фабрицио Романо бу видеомурожаатни ўз Twitter саҳифасида репост қилган.

Мессининг айтишича, “Лорьян” билан ўйиндан сўнг жамоа дам олишга ҳақли, деб ўйлагани учун Саудия Арабистонига учиб кетган. 

“Ҳаммага салом, бўлиб ўтган воқеалардан кейин ушбу видеони ёзишга қарор қилдим. Энг аввало, клубдошларимдан кечирим сўрайман. Ҳозирда клуб масалам юзасидан қандай қарорга келишини кутиб турибман. Тўғрисини айтсам, ҳар доим бўлгани каби, ўйиндан сўнг дам олсак бўлади, деб ўйлагандим. Саудия Арабистонига сафарим аввалдан режалаштирилган  эди. Уни бекор қила олмасдим. Чунки аввал ҳам бу ишни қилганим учун бу гал ваъдамда туришга қарор қилдим”, дея изоҳ берган Месси. 

Айрим тахминларга кўра, Париж футбол клуби суперюлдуз билан шартномани узайтирмасликка қарор қилган.

Бошқа хабарларда эса, Мессининг Саудия Арабистонидаги “Ал-Хилол” клубига ўтиш ҳақида тасмий таклиф олгани айтилмоқда. 

“Ал-Хилол” клуби аргентиналик футболчини чақирган ҳозирча ягона клуб бўлиб, бошқа клублар жаҳон чемпионига эътибор беришмаган. 35 ёшли Мессининг Саудия Арабистонидаги маошига йилига 400 миллион доллар этиб белгиланиши мумкин.

Агар Месси бу клуби билан шартнома имзоласа, бу мамлакатда ўйнаётган яна бир буюк футболчи – Жаҳон Чемпионатидан сўнг Ар-Риёднинг “Ан-Наср” клубига ўтган Криштиану Роналдуга рақобатчи бўлиши мумкин. 

Ҳозирча эса Месси бир йилда 130 миллион даромад қилади. Бу пулларнинг ярмини у майдондаги чиқишлари учун, ярмини эса майдон ташқаридаги фаолияти учун олади. Месси бу кўрсаткич билан дунёдаги энг кўп пул тўланадиган футбол юлдузи, йилига 136 миллион доллар даромад қиладиган Роналдудан кейинги ўринда туради.