Россияга қарши янги санкциялар тайёрланмоқда

Бу гал ташаббусчи мамлакатлар аввалги санкциялар пакетларидаги “бузиб ўтиш мумкин бўлган” бўшлиқларни ёпиш ва санкцияларни эҳтимолий четлаб ўтишларнинг олдини олишга эътибор қаратишмоқда.

Аввалроқ АҚШ барча G7 давлатларидан Россияга экспортни бутунлай тақиқлашни таклиф қилган, бироқ Япония ва ЕИ бунга рози бўлмаган эди.
Кутилаётган янги санкцияларнинг ўзига хос жиҳати шундаки, улар АҚШ, Европа Иттифоқи ва бошқа давлатлар томонидан мустақил равишда киритилади, бироқ бошқалар билан мувофиқлаштирилади, деб ёзган Bloomberg хабардор манбаларига таяниб.

Асосий мақсад – янги чекловлар киритиш эмас, балки шу пайтгача татбиқ этилган санкцияларни четлаб ўтишга барҳам беришдан иборат, дейишган нашр манбалари. Ушбу янги режалар ҳақида шу ойда Японияда бўлиб ўтадиган “Катта саккизлик” давлатлари раҳбарларининг учрашувида маълум қилинади. Саммитда етакчилар Россияга қарши қайси чоралар самара бергани ва яна қандай вариантлар қолаётганини ҳам муҳокама қилишади. Шу пайтгача киритилган чекловлар инобатга олинса, санкциялар учун янги соҳаларни топиш осон бўлмайди.

Янги санкциялар пакети Европа Иттифоқи учун 11-пакет ҳисобланади.

Муҳокама қилинадиган чоралар орасида – кўплаб товарларни Россия ҳудуди орқали транзит қилишни тақиқлаш ва навигацион тизимларини ўчириб қўядиган кемаларга нисбатан чеклов киритиш ҳам бор.

Шунингдек, тахминан 30 кишига нисбатан персонал санкциялар жорий этилиши ҳам мумкин.

Аввалроқ, АҚШ ҳукуматининг янги санкциялар пакетидан россиялик миллиардер Алишер Усмоновга қарашли USM ҳолдинги ҳамда унинг таркибидаги "Металлоинвест", "Мегафон" компанияларига қарши чекловлар ҳам жой олгани маълум бўлганди.