Қидирувга берилган жиноятчи Польшадан Ўзбекистонга экстрадиция қилинди
Интерполнинг Ўзбекистон Республикасидаги Миллий марказий бюроси ходимлари томонидан фирибгарлик содир этгани учун халқаро қидирувда бўлган жиноятчини экстрадиция қилиш бўйича процедура амалга оширилди.
Интерполнинг Варшава ва Тошкент Миллий марказий бюроларининг ҳамкорликдаги фаол саъй-ҳаракатлари натижасида 2022-йилнинг март ойида Польшада Интерполнинг Қизил хабарномасига алоқадор шахс сифатида ҳибсга олинган, ҳуқуқ-тартибот идораларимиз томонидан фирибгарлик учун қидирувга берилган жиноятчи Ўзбекистон Республикасига экстрадиция қилинди.
Қидирувдаги шахс жабрланувчи Жанубий Кореяга ишлаш учун чет элга чиқиш ниятида эканини била туриб, ҳужжатларни расмийлаштириш ва мамлакатга киришга рухсат олиш бўйича ўз хизматларини таклиф қилган ва бу ишлар сарф-харажат талаб қилишини билдирган. Шу тарзда, қисқа вақт ичида фирибгар бир неча кишиларни пулга туширди.
Жиноятчи пулларни ўзлаштирган ҳамда ваъдаларини бажармаган ҳолда чет давлатга қочишга муваффақ бўлган, бироқ Ўзбекистон ва Польша давлатлари ММБ ходимларининг ҳамкорликдаги ҳаракатлари натижасида қидирувдаги шахс аниқланди ва қўлга олинди.
Ўзбекистон Республикаси Бош прокуратурасининг экстрадиция тўғрисидаги сўрови қаноатлантирилгандан сўнг, Интерпол ходимлари ҳамроҳлигида шу кунларда жиноятчи Ўзбекистонга олиб келинди, уни олдинда адолатли суд кутмоқда, дейилади Интерполнинг Ўзбекистон Республикасидаги Миллий марказий бюроси хабарида.
