Ўзбекистон ижтимоий давлат деб эълон қилинмоқда

Янгиланаётган Конституцияда Ўзбекистон ижтимоий давлат деб эълон қилинмоқда. Бунда фуқароларнинг ижтимоий жиҳатдан эҳтиёжманд тоифалари уй-жой билан таъминланиши, меҳнатга ҳақ тўлашнинг энг кам миқдори инсонга муносиб яшашини таъминлашни ҳисобга олган ҳолда белгиланиши, фуқароларнинг тиббий ёрдамнинг кафолатланган ҳажмини давлат ҳисобидан олишга ҳақлилиги ва бошқалар белгиланмоқда. Бошқача айтганда, ижтимоий давлатга хос бўлган барча элементлар Конституциямизда акс эттирилмоқда.
Шунингдек, муҳокама жараёнида қайд этилишича, ногиронлиги бўлган шахсларни давлат томонидан қўллаб-қувватлашни назарда тутувчи қоидалар янада такомиллаштирилган. Жумладан, давлат ногиронлиги бўлган шахсларнинг ижтимоий, иқтисодий ҳамда маданий соҳалар объектлари ва хизматларидан тўлақонли фойдаланиши учун шарт-шароит яратиши, уларнинг ишга жойлашишига, таълим олишига кўмаклашиши, зарур ахборотни тўсқинликсиз олиш имкониятини таъминлаши мустаҳкамланмоқда.

Эслатиб ўтамиз: айни пайтда Қонунчилик палатасида аҳолининг 220 мингдан зиёд таклифлари асосида Янгиланаётган Конституциянинг муҳокамаси бўлиб ўтаётгани ҳақида аввалроқ хабар қилгандик.