Эрон олий раҳбари халққа мурожаат билан чиқди
Баёнотда Ислом Республикасининг ядровий ва ракета салоҳиятини "миллий бойлик" сифатида ҳимоя қилиш ниятига урғу берилган.
28 февралдан бери омма олдида кўринмаган Эрон Олий Раҳбари Можтаба Хоманаий халққа мурожаат қилди.
Форс кўрфази миллий куни муносабати билан ушбу мурожаат Эрон телевидениеси суҳандони томонидан ўқиб эшиттирилди ва Хоманаийнинг расмий веб-сайтида эълон қилинди.
Баёнотда Ислом Республикасининг ядровий ва ракета салоҳиятини "миллий бойлик" сифатида ҳимоя қилиш ниятига урғу берилган. Эрон раҳбарининг сўзларига кўра, уларни мамлакат ичида ва ташқарисида яшовчи "90 миллион мағрур ва олижаноб эронликлар" ҳимоя қилади.
Оятуллоҳ шунингдек, Форс кўрфазидаги воқеаларга мурожаат қилиб, унинг келажаги "Америкасиз" эканлигини эълон қилди. "... ўз манфаатлари ва ёвуз ниятлари билан минглаб километр масофани босиб ўтган чет элликлар учун (Форс кўрфазида - таҳр) унинг тубидан бошқа жойи йўқ", деб таъкидлади у.
Ўз хабарида Можтаба Хоманаий Ҳормуз бўғозида "душманнинг ўз манфаати йўлида ҳаракат қилишининг олдини олишга" ваъда берди ва Эрон бўғоздан ўтаётган кемалар учун тўлов олиш қароридан воз кечишни ният қилмаслигини аниқ кўрсатди.
"Бўғоз учун янги бошқарув тизими минтақадаги барча мамлакатларга фаровонлик ва тараққиёт олиб келади, иқтисодий фойда эса одамлар қалбини қувончга тўлдиради", дейилади баёнотда.
Форс кўрфази миллий куни - 1622 йилда Шоҳ Аббос I ва Британиянинг "Ост Индия" компаниясининг биргаликдаги саъй-ҳаракатлари билан португалларнинг Ҳормуз оролидан қувиб чиқарилишини хотирлаш учун ташкил этилган расмий байрамдир.
