АҚШ элчиси ноқонуний миграцияга қарши курашда Ўзбекистонга миннатдорчилик билдирди
Элчихона икки ўзбек компанияларига виза чеклови киритилганини изоҳлаб ўтди.
АҚШ элчиси Жонатан Хеник ноқонуний миграцияга қарши курашда Ўзбекистонга миннатдорчилик билдирди.
АҚШнинг Тошкентдаги элчихонаси ўзбек компанияларига виза чеклови бўйича изоҳ берди.
АҚШ Давлат департаменти бугун Ўзбекистондан АҚШГА ноқонуний иммиграцияга била туриб кўмаклашгани аниқланган шахсларга нисбатан виза чекловлари жорий этилганини эълон қилди.
Айтилишича, ушбу чора-тадбирлар Қўшма Штатлар ва Ўзбекистон ҳукумати ўртасида минтақавий хавфсизликни мустаҳкамлаш ҳамда қонун устуворлигини таъминлаш борасидаги яқин ва давомий ҳамкорликнинг бевосита натижасидир.
“Қўшма Штатлар Ўзбекистон ҳукуматидан беҳад миннатдор. Унинг яқин ҳамкорлиги ва умумий хавфсизлик манфаатларимизга қатъий содиқлигисиз биз бу муҳим чораларни амалга ошира олмаган бўлардик. Ноқонуний миграцияга қарши курашиш ва жиноий контрабанда тармоқларига барҳам бериш борасидаги Ўзбекистоннинг фаол саъй-ҳаракатлари минтақа учун ўрнакдир. Биз ноқонуний иммиграцияга қарши курашиш ва чегара хавфсизлигини таъминлаш йўлидаги ҳамкорлигимизни давом эттириш ва янада чуқурлаштиришни интиқлик билан кутамиз”, деди элчи Жонатан Хеник.
Ушбу чора асосан АҚШга ноқонуний иммиграция қилиш ниятида эканлигини била туриб ушбу шахсларга сафар билан боғлиқ хизматларини кўрсатган, визага кўмаклашувчи Ўзбекистондаги иккита компаниянинг раҳбарлари ва мансабдор шахсларига нисбатан қўлланилади.
Бу чоралар Иммиграция ва фуқаролик тўғрисидаги қонуннинг (ИНА) 212(а)(3)(C) моддасига мувофиқ амалга оширилмоқда. Мазкур модда, фаолияти АҚШ ташқи сиёсати учун жиддий салбий оқибатларга олиб келиши мумкин бўлган шахсларнинг мамлакатга киришини тақиқлайди.
Терговлар натижасига кўра, Ўзбекистондаги мазкур шахслар АҚШГА ноқонуний иммиграция қилишни мақсад қилган фуқаролар, жумладан, вояга етмаганларнинг аэропортлар ва чегаралар орқали Марказий Америкадаги транзит пунктларига етиб олишини фаол равишда мувофиқлаштирганлар. Кейинчалик бундай фуқароларнинг кўпчилиги Қўшма Штатлар ҳудудига ноқонуний киришга уринаётганда қўлга олинган.
"Қўшма Штатлар АҚШга ноқонуний иммиграцияга кўмаклашувчи жиноий тармоқларга барҳам беришдаги яқин ҳамкорлиги учун Ўзбекистон ҳукуматига ўзининг чуқур миннатдорлигини яна бир бор билдиради. Биз ҳар икки халқимизнинг хавфсизлиги ва фаровонлигини таъминлаш йўлида Ўзбекистон билан елкама-елка иш олиб бораётганимиздан фахрланамиз", дейилади хабарда.
