Декабр ойидан Ўзбекистонда нималар ўзгаради?

1 декабрдан Ўзбекистонда нималар ўзгаради? Қуйида батафсил маълумотни тақдим этамиз.

Сейсмологик онлайн платформа ишга туширилади

Президентнинг октябрдаги фармони билан сейсмик хавфсизликни таъминлаш ва сейсмология соҳасидаги ишлар самарадорлигини янада ошириш бўйича қўшимча чора-тадбирлар белгиланди.

Унга мувофиқ,2025 йил 1 декабрдан йилдан бошлаб ягона тизим асосида сейсмологик онлайн платформа рақамлаштириш билан ишга туширилади:

-минтақавий акселерограммалар эҳтимолий зилзилалар базаси;

-илмий таҳлил асосида республика ҳудудларини сейсмик хавф даражаси бўйича таснифлашни назарда тутувчи умумий сейсмик ва батафсил районлаштириш хариталари;

-микрорайонлаштириш хариталари туман ва шаҳар марказлари макросейсмик баллар ва энг юқори тезланишларда;

-республикадаги мавжуд хариталар фаол тектоник узилмалар.

Зилзилалар кучини кўрсатиб берувчи минтақавий акселерограммалар базаларидан келиб чиқиб лойиҳалаштириш амалиёти йўлга қўйилади

2025 йил 1 декабрдан зилзилалар кучини кўрсатиб берувчи минтақавий акселерограммалар базаларидан келиб чиқиб лойиҳалаштириш амалиёти йўлга қўйилади.

Бу Вазирлар Маҳкамасининг 17 ноябрдаги «Бино ва иншоотларнинг зилзилабардошлигини оширишга оид қўшимча чора-тадбирлар тўғрисида»ги қарорида кўзда тутилган.

Президентнинг апрелдаги қарорига мувофиқ, хавфлилик омили III-IV тоифа бўлган объектларни ҳудуднинг зилзилалар кучини кўрсатиб берувчи минтақавий акселерограммалар базаларидан келиб чиқиб лойиҳалаштириш ва қуриш тартиби жорий этилиши белгиланган.

Истеъмолчиларнинг мурожаатларини кўриб чиқишда янги тизим жорий этилади

Истеъмолчиларнинг мурожаатларини кўриб чиқиш самарадорлигини ошириш мақсадида 2025 йил 1 декабрдан бошлаб «истеъмолчи — тадбиркор — нодавлат нотижорат ташкилотлар — давлат органлари» тизими жорий этилади.

Бунда:

истеъмолчиларнинг барча мурожаатлари Рақобат қўмитасида ишга тушириладиган «Истеъмолчи мурожаати» ахборот тизими орқали қабул қилинади ва барча босқичларда мониторинг қилиб бориш тизими йўлга қўйилади;

«Истеъмолчи мурожаати» ахборот тизимини Солиқ қўмитасининг ягона ахборот тизимига интеграция қилиш орқали барча тадбиркорлик субъектларига истеъмолчилардан мурожаатлар келиб тушгани ҳақида хабар юбориш тизими йўлга қўйилади;

истеъмолчининг «Истеъмолчи мурожаати» ахборот тизими орқали рўйхатга олинган мурожаати, биринчи навбатда, тадбиркор томонидан Рақобат қўмитаси назорати остида 10 кун ичида кўриб чиқилади, истеъмолчи мурожаати ижобий ҳал этилмаган тақдирда, мурожаатчининг танловига кўра Қўмитага ёки нодавлат нотижорат ташкилотларга ўрганиб чиқиш учун юборилади.

Тадбиркорларга қўшимча равишда кафолатлар тақдим этилади

Президентнинг 26 сентябрдаги «Тадбиркорлик субъектларини янгича ёндашувлар асосида қўллаб-қувватлаш чора-тадбирлари тўғрисида»ги фармонига мувофиқ, 2025 йил 1 декабрдан Тадбиркорликни ривожлантириш компанияси томонидан қўшимча равишда кафолат ёки кафиллик қуйидаги шартларда тақдим этилади:

-йирик тадбиркорлик субъектларига 10 миллиард сўмгача, бироқ кредит, лизинг, банк кафолати ва аккредитивларнинг 50 фоизидан ортиқ бўлмаган миқдорда;

компаниянинг кузатув кенгаши қарори билан белгиланган тартибда ўрта ва йирик тадбиркорлик субъектларининг ишлаб чиқариш, хизмат кўрсатиш ва «яшил» иқтисодиёт йўналишидаги йирик лойиҳаларига уларнинг айланмасидан келиб чиқиб, 10 миллиард сўмдан ортиқ бўлган миқдорда;

-аввал кафилликдан ижобий фойдаланган ва яхши кредит тарихига эга бўлган тадбиркорлик субъектларига амалда белгиланган кафиллик миқдорини 1,5 бараваргача оширган ҳолда;

-гаров таъминоти бўйича юзага келган тақчилликни бартараф этиш учун барча тоифадаги тадбиркорлик субъектларига белгиланган миқдорлар доирасида ажратилган кредит, лизинг, банк кафолати ва аккредитивларга.

ННТлар электрон идоралараро ҳамкорликни амалга оширади

Президентнинг давлат бошқаруви ва иқтисодиётнинг реал секторини рақамли трансформация қилиш чора-тадбирлари тўғрисидаги қарорига мувофиқ, 2025 йил 1 декабрдан бошлаб нодавлат нотижорат ташкилотларига «Рақамли ҳукумат» тизимининг Идоралараро интеграциялашув платформаси орқали белгиланган тартибда электрон идоралараро ҳамкорликни амалга оширишга рухсат берилади.

Нотариал тасдиқланган никоҳ шартномалари аслини нотариусга тақдим этиш талаб қилинмайди

«Нотариат институтини янада ривожлантириш ва соҳага замонавий ахборот-коммуникация технологияларини кенг жорий этиш бўйича қўшимча чора-тадбирлар тўғрисида»ги президент қарори билан нотариал хизматлар кўрсатишда бир қатор талаблар бекор қилинди.

Хусусан, 2025 йил 1 декабрдан республикада нотариал тасдиқланган никоҳ шартномалари нусхасини «Нотариус» ахборот тизимига мажбурий юклаш тартиби жорий этилади ҳамда уларнинг аслини нотариусга тақдим этиш талаб қилинмайди. Бунда нотариал ҳаракатларни амалга ошириш жараёни қайд этилган аудио ва видеоёзувлар электрон қурилмаларда сақланади ҳамда уларни Тизимда тўғридан-тўғри нотариал ҳаракатга бириктириш ва сақлаш имконияти яратилади.

Никоҳни расмийлаштиришда тиббий маълумотнома кўрсатиш талаби бекор қилинмоқда

Президентнинг бюрократик тартибларни қисқартиришни назарда тутувчи фармонига мувофиқ, 1 декабрдан идоралараро ахборот алмашинувини йўлга қўйиш орқали никоҳ тузилгани ва никоҳдан ажратилганлик тўғрисидаги далолатнома ёзувларини шакллантиришда қуйидаги ҳужжатларни тақдим этиш талаби бекор қилинади:

-никоҳни расмийлаштиришда ФҲДЁ органлари томонидан никоҳланувчи шахсларнинг саломатлиги тўғрисида тиббий маълумотнома тақдим қилиш;

-никоҳдан суд қарори асосида ажратилганда, тегишли далолатнома ёзувини шакллантириш учун ФҲДЁ органларига суд қарорини тақдим этиш.

Экология бўйича маълумотлар очиқ бўлади

Ўзбекистон президентининг 15 майдаги қарори билан 2030 йилгача бўлган даврда аҳолининг экологик маданиятини ошириш концепцияси тасдиқланган эди.

Орхус конвенциясига қўшилиш доирасида 1 декабрдан Экология вазирлиги давлат атроф-муҳит мониторинги маълумотлар базасининг жамоатчилик учун очиқ бўлишини таъминлайди.

Хусусан, «Яшил макон» лойиҳаси доирасида ҳар йили экиладиган дарахт ва кўчатлар, жумладан, экиш манзиллари, уларни парвариш қилиш учун масъул шахслар, кўчат турлари ва бошқа маълумотлар жойлаштирилади.

Халқаро туризм академияси Самарқанд кампуси фаолият бошлайди

Президентнинг Халқаро туризм академияси Самарқанд кампуси фаолияти ташкил этишга оид қарорига мувофиқ, 2025 йил 1 декабрдан:

-туризм соҳаси субъектлари мутахассислари шартнома асосида қайта тайёрланади ва малакаси оширилади.

Ҳар йили Бутунжаҳон туризм ташкилотига аъзо давлатларнинг 100 нафар иқтидорли мутахассисларига Академиянинг қайта тайёрлаш ва малака ошириш ўқув дастурларида таълим олиш учун махсус грант ажратилади.

Нодавлат суд экспертлари якка тартибда фаолият юрита бошлайди

Суд-экспертлик фаолияти рақамлаштиришга оид президент қарорига мувофиқ, 2025 йил 1 декабрдан нодавлат суд экспертларига якка тартибда суд-экспертлик бюроси шаклида фаолият юритиш ҳуқуқи берилади.

Норматив-ҳуқуқий ҳужжатларни таҳлил қилиш платформаси ишга туширилади

2025 йил 1 декабрдан фуқаролар, адвокатлар, юристлар, судьялар учун норматив-ҳуқуқий ҳужжатларни таҳлил қилиш платформаси ишга туширилади. Бу судлар фаолиятида сунъий интеллект технологияларини жорий этишга оид президент фармонида кўзда тутилган.

Шунингдек, 2025 йил якунигача суд ҳужжатларини автоматик тайёрлаш махсус ахборот дастури яратилади.