Орден олган Асака ҳокимининг аудиоси тарқалди
Насибулла Мўминовга тегишли экани айтилган овоз эгаси фуқарони сўкиб, ҳақоратлаган.
Кеча Асака тумани ҳокими Насибулла Мўминов "Дўстлик" ордени билан мукофотланди. У президентга 2025 йил якунигача туманда камбағаллик ва ишсизликни қисқартиришга ваъда берганди.
Мукофот олиши ва ушбу ваъдасини беришдан бир кун олдин ижтимоий тармоқларда Насибулла Мўминовга тегишли деб айтилган аудио тарқалди. Аудиода ҳоким бир фуқарони сўкиб, ҳақоратлагани эшитилган.
Ҳозиргача мазкур ҳолатга на вилоят ҳокимлиги ва на туман ҳокимлиги муносабат берган.
Шу ўринда эслатиб ўтиш керак, ушбу ҳоким сўнгги бир йил ичида 2 марта огоҳлантириш олган. Аҳоли мурожаатлари билан ишлашда сусткашлик қилгани учун Халқ депутатлари вилоят кенгаши унга 2024 йил июл (ҳужжат яшириб қўйилган) ва 2025 йил март ойларида расмий огоҳлантириш берган.