Яқин Шарқдаги вазият ҳақида етакчи давлатлар нима дейди?

Яқин Шарқдаги кескинликнинг кучайишидан хавотирланган дунё етакчилари АҚШ Эроннинг ядровий иншоотларига ҳужум уюштирганидан кейин муносабат билдиришди.

Буюк Британия: Ташқи ишлар вазири Девид Ламми Х’даги постида Эронни "ўзини тутиб туришга ва бу инқирозни тугатиш учун дипломатик ечим топишга" чақирди ва Буюк Британия АҚШ зарбаларига алоқадор эмаслигини таъкидлади. Бош вазир Кей Стармер аввалроқ Эронни АҚШ зарбаларидан кейин музокаралар столига қайтишга чақириб, Эроннинг ядровий дастурини “халқаро хавфсизликка жиддий таҳдид” деб атаган эди.

Франция: Ташқи ишлар вазири Жан-Ноэл Баррот, Франция АҚШнинг бир кечада берган зарбаларини "хавотир" билан кўрганини ва уларда иштирок этмаганини айтди. "Франция Эроннинг ядровий қуролга эга бўлишига бир неча бор ўзининг қатъий қаршилигини билдирган. Франция бу масалани доимий ҳал қилиш учун Ядро қуролларини тарқатмаслик тўғрисидаги шартнома доирасида музокаралар йўли билан ҳал этиш зарурлигига ишончи комил", деб давом этди у. "У ўз ҳамкорлари билан ҳамкорликда бунга ҳисса қўшишга тайёр".

Германия: Ҳукумат матбуот котиби Стефан Корнелиуснинг айтишича, Эрон ядровий майдонларига АҚШ бомбалари ташланганидан кейин Германия вазирлар маҳкамаси йиғилган. "Федерал канцлер ва Хавфсизлик маҳкамаси вазирлари кун давомида ЕИ ва АҚШдаги ҳамкорлари билан кейинги қадамлар бўйича яқиндан маслаҳатлашадилар. Федерал канцлер Фридрих Мерц Эронни АҚШ ва Исроил билан зудлик билан музокаралар олиб боришга ва можарога дипломатик ечим топишга чақирганини яна бир бор такрорлади", деди у.

Хитой: Ташқи ишлар вазирлиги вакили: "Хитой АҚШнинг Эронга ҳужумини ва Халқаро атом энергияси агентлиги назоратидаги ядровий иншоотларни кескин қоралайди. АҚШнинг бу ҳаракати БМТ Низоми ва халқаро ҳуқуқнинг мақсад ва тамойилларини жиддий равишда бузади ҳамда Яқин Шарқдаги кескинликни кучайтиради", деди.

"Хитой можаро томонларини, айниқса Исроилни имкон қадар тезроқ ўт очишни тўхтатишга, тинч аҳоли хавфсизлигини таъминлашга, мулоқот ва музокараларни бошлашга чақиради. "Хитой халқаро ҳамжамият билан қўл қовуштириш, адолатни таъминлаш ва Яқин Шарқда тинчлик ва барқарорликни тиклаш учун саъй-ҳаракатлар қилишга тайёр”, дея қўшимча қилди у.

Япония: Бош вазир Шигеру Ишиба “барқарор деэскалация энг муҳими”, аммо “шу билан бирга, Эрон ядровий қурол ишлаб чиқаришни тўхтатиши керак”, деди. У якшанба куни Токиода журналистларга "биз у ердаги вазиятни жиддий хавотир билан кузатиб борамиз", деди.

Европа Иттифоқи: Европа Комиссияси президенти Урсула фон дер Ляэн "барқарорлик устувор бўлиши керак" ва "халқаро ҳуқуқни ҳурмат қилиш жуда муҳим" деди. "Энди Эрон учун ишончли дипломатик ечимга интилиш вақти келди. Музокаралар столи бу инқирозни тугатиш учун ягона жойдир", деди у.

Европа Кенгаши президенти Антонио Коста “Яқин Шарқдаги янгиликлардан қаттиқ хавотирда” эканини айтди.

“Яқин Шарқ минтақасида тинчлик ва хавфсизликни таъминлашнинг ягона йўли дипломатия бўлиб қолмоқда. Жуда кўп тинч аҳоли яна кескинлашув қурбони бўлади. Европа Иттифоқи музокаралар столида тинч йўл билан ечим топиш учун томонлар ва ҳамкорларимиз билан ҳамкорлик қилишда давом этади”, дея қўшимча қилди у.

Ўзбекистон: Ташқи ишлар вазирлиги матбуот хизмати Ўзбекистон Яқин Шарқдаги вазиятнинг шиддат билан кескинлашётганидан чуқур хавотир олаётганини билдирди.

ТИВ Ўзбекистон фуқароларидан Исроил ва Эронга сафар қилишдан тийилишни, ушбу мамлакатларда бўлган фуқароларимиздан эса имкони борича хавфсиз ҳудудларга чиқиб кетишларини сўрамоқда.

“Хавфсизликни таъминлаш мақсадида зарур чоралар кўрилмоқда, фуқароларимиздан ҳушёрликни сақлашни ва расмий эълонларни кузатиб боришни илтимос қиламиз”, дейилади хабарда.