АҚШ Эроннинг 3 та ядро иншоотига бомба ташлади
Оғирлиги 13 тоннадан ортиқ ушбу бомбалар "бункер бузувчи" номи билан аталади ва АҚШ тарихида илк бор қўлланилди.
Бугун эрта тонгда АҚШ президенти Доналд Трамп Эрондаги учта ядро иншооти АҚШ ҳаво кучлари томонидан бомбаланганини эълон қилди.
Тоғ остидаги Фордо, Натанс ва Исфаҳондаги ядро масканларига 13 тонналик улкан бомба ташланган. Бу бомба АҚШ тарихида илк бор қўлланилган.
Трамп Пентагонда матбуот анжумани ташкил этиб, шу билан иш битганини, энди тинчлик ўрнатиш вақти келганини билдирган. Ҳозирча Эроннинг бу ҳужумга қандай жавоб қайтариши номаълум.
"Эроннинг Америка қўшма штатларига қарши ҳар қандай ҳаракатига бугунгидан-да кучлироқ зарбалар билан жавоб берамиз. Раҳмат", деган Трамп матбуот анжуманида.
БМТ бош котиби Антониу Гутерриш АҚШнинг бу ҳаракатини кескин қоралаб, глобал тинчликка таҳдид деб атаган. Исроил томони эса Эроннинг бу ҳужумга қарши жавоби қандай бўлишига қараб иш тутишини билдирган.