“Humans” ўз мажбриятларини мунтазам бажармай келгани маълум бўлди

Айрим оммавий ахборот воситалари томонидан “Humans” МЧЖ айрим давлат ташкилотлари томонидан етказилган зарар учун компенсация ундирмоқчилиги юзасидан маълумотлар тарқалганди. Аввалроқ Humans'нинг ўзи “Ўзбектелеком” АКнинг қарзларни тўлаш, акс ҳолда тармоқдан узиб қўйилиши ҳақидаги огоҳлантиришидан кейин, Рақобат қўмитасига шикоят аризаси киритгани ҳам ОАВ орқали тарқалган эди.

Ўзи аслида нима бўлган эди?

Биринчидан, Humans виртуал оператори, бошқа мобил операторлардан фарқли равишда, ўз тармоғини яратиш учун сармоя киритмаган. Шунинг учун, у мобил алоқа хизматларини кўрсатишга 2020 йилдан буён шартнома асосида “Ўзбектелеком” АК мобил тармоғидан фойдаланиб келган.

Иккинчидан, баъзи ОАВларда “Ўзбектелеком” АК томонидан Humans операторига нисбатан “бозордаги устун (монопол) мавқесидан фойдаланиб босим ўтказаётгани” тўғрисида нохолис ахборотлар тарқалмоқда. Аслида: Humans ўз инфраструктурасига эга “Ўзбектелеком” АКдан ташқари Ucell, Beeline, Mobi.uz каби бошқа мобил операторлари билан ҳам шартнома асосида хизматларини кўрсатиши мумкин, қонунчиликда фақат “Ўзбектелеком” АК билан мобил инфраструктурадан фойдаланиш керак деб ҳеч жойда белгиланмаган.

Учинчидан, “Ўзбектелеком” АК Ўзбекистонда интернет хизматларини арзонлаштириш ва уларни аҳолига янада қулай қилиш бўйича муҳим ишларни амалга ошириб келмоқда. Натижада, Халқаро интернет каналларининг ўтказувчанлик қобилияти кенгайтирилиши ҳисобига оператор ва провайдерлар учун 1 Мбит/с интернет нархи 2017-2024 йилларда 40 баробарга арзонлаштирилди.

Тўртинчидан, Humans узоқ муддат давомида шартнома мажбуриятларини тизимли равишда бузиб келган, яъни кўрсатилган хизматлар бўйича катта миқдорда қарздорликни тўламаган. “Ўзбектелеком” АК фақат истеъмолчилар хуқуқи бузилмасин, улар Humans бўладими, бошқа операторми истеъмолчи тўлаган пулига яраша хизмат олсин, деб ўз хизматини давом эттирган.

Шу муносабат билан “Ўзбектелеком” АК мавжуд қарздорликни ундириш ва келгусида компанияга зарарни камайтириш мақсадида тегишли судга даъво аризаси киритишга мажбур бўлди. Мазкур даъво жорий йилнинг 8 май куни Тошкент шаҳар иқтисодий судининг “Ўзбектелеком” АК томонидан кўрсатилган хизматлар учун қарздорлик юзасидан “Humans” компаниясига нисбатан чиқарган суд қарори эълон қилинди.

Агар келгусида жамоатчиликни, тартибга солувчи органлар ва бизнес ҳамкорларни чалғитувчи, ҳақиқатга тўғри келмайдиган маълумотлар тарқатилса, “Ўзбектелеком” АК ўз ишбилармонлик обрўсини ҳимоя қилиш мақсадида судга мурожаат қилиш ҳуқуқини ўзида сақлаб қолади.

“Ўзбектелеком” АК очиқлик, ҳалол рақобат ва амалдаги қонунчиликка риоя қилиш тамойилларига содиқлигини тасдиқлайди. Компания бозордаги исталган иштирокчи, жумладан, Humans компанияси билан, улар ўз мажбуриятларини виждонан бажарган тақдирда конструктив мулоқотга очиқ.