"Дунёдаги энг қашшоқ президент" вафот этди
Мухика 1935 йил Монтевидеода туғилган ва 2009 йилда Уругвай президенти этиб сайланган. У жуда камтарона ҳаёт тарзи билан машҳур эди.
Уругвайнинг собиқ раҳбари, тежамкор турмуш тарзи учун дунёнинг энг қашшоқ президенти номини олган Хосе Мухика 89 ёшида вафот этди.
“Биз ўртоқ Пепе Мухиканинг вафоти ҳақида чуқур қайғу билан маълум қиламиз”, деб ёзди Уругвай президенти Яманду Орси Х ижтимоий тармоғида.
"Сизни жуда соғинамиз. Бизга берган барча нарсангиз ва халқимизга бўлган буюк меҳрингиз учун сизга раҳмат", - дея қўшимча қилди у.
Мухика 1935 йил 20 майда Монтевидеода туғилган ва 2009 йилда Уругвай президенти этиб сайланган. Мухика 90 ёшга тўлишидан бир неча кун олдин вафот этган.
Ёшлигида, 1960-1970-йилларда у Куба инқилоби ғояларидан илҳомланган, ҳокимиятга қарши курашда партизан усулларини қўллаган “Тупамарос” чап қанот радикал ҳаракати сафида курашган.
У жангларда олти марта яраланган ва 14 йил қамоқда ўтирган. Мухика жазо муддатининг кўп қисмини бир кишилик камерада ўтаган. У 1985 йилда, Уругвайга демократия қайтганида озодликка чиқди.