Oʻzbekistonga issiq harorat ortidan nam va sovuq havo kirib keladi

Gidrometeorologiya xizmati xabariga koʻra, yaqin kunlarda Oʻzbekistonda yogʻingarchilik kuzatiladi va harorat pasayadi.

Joriy yilning 23-25 mart kunlari Oʻzbekiston hududiga nam va nisbatan salqin havo massalari kirib keladi.

Respublika boʻyicha ob-havoning keskin oʻzgarishi kutilmoqda.

23-25 mart kunlari respublika boʻyicha yomgʻir yogʻadi, baʼzi joylarda kuchli boʻladi, momaqaldiroq kuzatilishi mumkin. Respublikaning togʻli hududlarida yomgʻir yogʻadi, qorga aylanish ehtimoli bor.

23-24 mart kunlari shamol tezligi baʼzi joylarda 13-18 m/s gacha kuchayadi, ayrim joylarda baʼzida 20 m/s gacha kuchayishi mumkin.

Kunduzgi havo harorati asta-sekin 12-17 daraja iliqqacha pasayadi.

Shuningdek, 22-27 mart kunlari respublikaning 9 ta viloyati togʻ va togʻ oldi tumanlarida kutilayotgan yogʻinlar ortidan sel-suv toshqin xavfini eʼlon qildi.

Eslatib oʻtamiz, mart oyining ikkinchi yarmidan Oʻzbekiston hududida issiq harorat kuzatilmoqda. Hududlarda harorat 30 darajadan ham oshdi.