Йўлларда мобил радарлар мавжудлигини кўрсатиш талаби бекор қилинди
Мазкур талаб энди фақат стационар радарларга тегишли бўлади. Мақсад йўл ҳаракати қоидалари бузилишлари сонини камайтириш сифатида кўрсатилган.
Вазирлар Маҳкамаси 29 октябрдаги қарори билан мобил радарлардан фойдаланишда "Радар" йўл белгиси бўлиши кераклиги тўғрисидаги талабни бекор қилди.
У 2025 йил 1 сентябрдан "Транспорт воситаларидан фойдаланишда аҳолига қўшимча қулайликлар яратиш тўғрисида"ги қарор билан жорий этилганди.
Бундан буён радар белгиси фақат ҳаракат тезлигини назорат қилувчи стационар радарлар олдига ўрнатилиши керак.
Йўл ҳаракати қоидалари белги радардан камида 250 ва кўпи билан 500 метр масофада жойлашиши кераклиги тўғрисидаги норма билан тўлдирилди.
Ўзгаришлардан мақсад сифатида қоидабузарликларни фото ва видеофиксация қилиш воситаларидан фойдаланишни такомиллаштириш орқали ЙҲҚ бузилишлари сонини камайтириш кўрсатилган.
