Қирғизистонда аскарларни уй қурилишига ишлатган командир ҳибсга олинди
Ҳарбийга нисбатан Қирғизистон Жиноят кодексининг 337-моддаси "Лавозим ваколатини суиистеъмол қилиш" бўйича жиноий иш қўзғатилган.
Қирғизистон Миллий хавфсизлик қўмитаси Мудофаа вазирлиги Миллий Гвардиясининг ҳарбий бўлинмаси командирини ҳибсга олди. Бу ҳақда хавфсизлик хизматлари хабар берди.
Уларнинг маълумотларига кўра, командир ўзининг шахсий уйини қуришга ҳарбий хизматчиларни мунтазам равишда жалб қилганликда гумон қилинмоқда.
Ҳодиса 20 октябр куни Ҳарбий прокуратура билан ҳамкорликда фош этилди. Қурилиш ишларида иштирок этган ҳарбий хизматчилар орасида ўша пайтда 24 соатлик навбатчиликда бўлганлар ҳам бор эди.
Қирғизистон Жиноят кодексининг 337-моддаси "Лавозим ваколатини суиистеъмол қилиш" бўйича жиноий иш қўзғатилди.
Офицер ҳибсга олинди ва Бишкек Ички ишлар бош бошқармасининг вақтинчалик ҳибсхонасига жойлаштирилди.
