Аварияга қарамай Россиядан Ўзбекистонга газ етказиб бериш режага мувофиқ давом этмоқда
Бу ҳақда Ўзбекистон Энергетика вазирлиги ҳамда Иқтисодиёт ва молия вазирлиги вакиллари маълум қилди. 13 октябрь куни Россиянинг Пенза вилоятида портлаш юз берганди.
Ўзбекистонга табиий газ етказиб бериш Россиянинг Пенза вилоятидаги магистрал газ қувурида содир бўлган аварияга қарамай, шартнома мажбуриятларига мувофиқ давом этмоқда.
Бу ҳақда 14 октябрь куни ўтказилган матбуот анжуманида Энергетика вазирлиги ҳамда Иқтисодиёт ва молия вазирлиги вакиллари маълум қилди.
Журналистлар 13 октябрь куни юз берган авария Россия гази импортига қандай таъсир кўрсатгани ва у олдинда турган иситиш мавсумида Ўзбекистонни газ билан таъминлашда хавф-хатар туғдирмайдими деб қизиққан.
"Газ етказиб бериш бўйича ҳукуматлараро битим амал қилмоқда ва ушбу битим доирасида барча томонлар ўз мажбуриятларини ўз вақтида бажармоқда", — деди у.
13 октябрь куни ОАВ Россиянинг Пенза вилояти Белинский туманидаги Волчково қишлоғи яқинида магистрал газ қувурида портлаш юз бергани ҳақида хабар берганди.
Юқори босимли қувурда ёрилиш содир бўлган, шундан сўнг кучли алангаланиш бошланган.
