WBA Бектемир Мелиқўзиев атрофидаги вазият бўйича баёнот берди
Ташкилот мексикалик чемпион Хайме Мунгияга чемпионлик камарини Ўзбекистон вакили Бектемир Мелиқўзиевга қарши мажбурий тарзда ҳимоя қилишни буюрган эди. WBA талабларига қарамай, Мунгия жамоаси россиялик Никита Зонга қарши ихтиёрий ҳимоя жанги ҳақида эълон қилди.
Жаҳон бокс ассоциацияси (WBA) ўзбекистонлик бокcчи Бектемир Мелиқўзиевнинг чемпионлик жанги билан боғлиқ вазият юзасидан расмий баёнот берди.
“WBA Хайме Мунгия ва Никита Зон ўртасидаги жангни тасдиқламаган. Бектемир Мелиқўзиев супер ўрта вазн тоифасидаги чемпионлик камари учун расмий даъвогар ҳисобланади. WBA ҳозирги вазиятни кўриб чиқади”, дейилади ташкилот хабарида.
Эслатиб ўтиш керак, WBA мексикалик чемпион Хайме Мунгияга чемпионлик камарини Ўзбекистон вакили Бектемир Мелиқўзиевга қарши мажбурий тарзда ҳимоя қилишни буюрган эди.
Мунгия жамоаси жангдан қочишга уриниб, Мелиқўзиевга бошқа жанг ўтказиши учун компенсация таклиф қилган. Бироқ ўзбекистонлик бокcчи бу таклифни рад этган ва чемпионлик камари учун бепул жанг қилишга тайёрлигини билдирган.
WBA талабларига қарамай, Мунгия жамоаси жорий йилнинг 31 октябрь куни Ар-Риёдда ўтказилиши режалаштирилган бокс кечасида россиялик Никита Зонга қарши ихтиёрий ҳимоя жанги ҳақида эълон қилган.
Мунгуя 2 май куни Лас-Вегасдаги “Т-Mobile Арена”да Хосе Армандо Ресендисни очколар ҳисобида мағлуб этиб, WBA чемпионлик камарини қўлга киритганди. Унинг мажбурий ҳимоя учун белгиланган 120 кунлик муддати 30 августда якунланган.
WBA қоидаларининг C.12-бандига кўра, чемпион мажбурий ҳимоя муддати тугашидан олдинги 60 кун ичида расмий мажбурий даъвогардан бошқа боксчига қарши жанг ўтказа олмайди.
