"Sea Breeze" лойиҳасининг биринчи ва иккинчи босқичи экологик экспертизадан ўтди

"Sea Breeze" лойиҳасининг биринчи ва иккинчи босқичи экологик экспертизадан ўтди.

Давлат экологик экспертизаси маркази хулосасига кўра, бугунги кунга қадар атроф-муҳитга таъсирни баҳолашнинг биринчи ва иккинчи босқичлари якунланиб, давлат экологик экспертизасининг тегишли хулосалари олинган.

Кўзда тутилган барча материаллар, ўтказилган тартиб-таомиллар, келиб тушган эътироз ва таклифлар, шунингдек, уларга тегишли тушунтиришлар очиқ фойдаланиш учун жойлаштирилмоқда. Бу лойиҳани экологик жиҳатдан кузатиб бориш жараёнининг шаффофлигини таъминлаш ҳамда уни амалга оширишнинг муҳим босқичларида жамоатчилик иштирокини йўлга қўйиш имконини беради.

Атроф-муҳитга таъсирни баҳолашнинг биринчи босқичи — асосий лойиҳа ечимлари амалга оширилишидан олдинги дастлабки экологик баҳолаш ҳисобланади. Ушбу босқичда объектнинг атмосфера ҳавоси, сув ва ер ресурслари, яшил ҳудудлар, биологик хилма-хиллик, чиқиндилар ҳосил бўлиши, муҳандислик инфратузилмаси ҳамда атроф-муҳитнинг бошқа таркибий қисмларига эҳтимолий таъсири аниқланади. Шу билан бирга, юзага келиши мумкин бўлган экологик хатарлар, уларни камайтириш бўйича таклифлар, шунингдек, жамоатчиликнинг эътироз ва таклифлари ҳам кўриб чиқилади.

Иккинчи босқич эса лойиҳа ечимларини янада чуқур ва батафсил баҳолашни назарда тутади. Ушбу босқичда таъсирнинг параметрлари ва кўлами аниқлаштирилади, табиатни муҳофаза қилиш ва компенсация чоралари, муҳандислик ечимлари, қурилиш ишларини ташкил этиш, чиқиндилар билан ишлаш, сувдан фойдаланиш, кўкаламзорлаштириш ҳамда экологик жиҳатдан муҳим бошқа масалаларга қўйиладиган талаблар конкретлаштирилади.

Яъни, Sea Breeze лойиҳасининг экологик баҳолаши бир марталик жараён ёки битта хулоса олиш билан чекланадиган расмий тадбир эмас. Бу лойиҳа ечимлари уларнинг батафсил ишлаб чиқилиши ва амалга оширилиши жараёнида изчил текшириб, аниқлаштириб бориладиган экологик назорат тизимидир, дейилади марказ хабарида.

Қурилиш ишлари якунлангач, якуний босқич назарда тутилган. У объектни фойдаланишга топширишдан олдин ўтказилиб, бунда лойиҳа бўйича кўзда тутилган ниятлар эмас, балки амалда амалга оширилган ечимлар баҳоланади. Яъни, назарда тутилган табиатни муҳофаза қилиш чоралари бажарилганми, белгиланган экологик талаблар таъминланганми ва қурилган объект илгари келишилган экологик шартларга мувофиқ келадими — шу жиҳатлар текширилади.

Шундай қилиб, лойиҳанинг экологик назорати унинг бутун ҳаётий цикли — лойиҳалаштириш ва қурилишдан тортиб, объектни фойдаланишга топширишгача бўлган даврни қамраб олади.

Бундан ташқари, лойиҳа нафақат давлат, балки жамоатчилик экологик назорати остида ҳам амалга оширилмоқда.

Жамоатчилик кенгаши аъзолари лойиҳа ҳудудига бевосита чиқиб, қурилиш ишларининг амалдаги бориши билан танишади ҳамда экологик талаблар ва табиатни муҳофаза қилиш чоралари бажарилишини текширади.

Бундай ташрифлар давомида ҳудуднинг ҳолати, қурилиш ишларини амалга ошириш шартларига риоя этилиши, қурилиш ва бошқа чиқиндилар билан ишлаш, яшил ҳудудларнинг ҳолати, лойиҳада назарда тутилган экологик тадбирларнинг бажарилиши ҳамда атроф-муҳит учун муҳим бўлган бошқа масалалар баҳоланади.

"Бугунги кунга қадар ўтказилган ташрифлар натижасига кўра, белгиланган экологик талаблар бузилганини кўрсатувчи ҳолатлар аниқланмади. Мониторинг давом этмоқда ва лойиҳанинг кейинги босқичларида экологик мажбуриятларнинг бажарилиши мунтазам кузатиб борилади", дейилади хабарда.