Сертификат имтиҳонларига ҳудудий чеклов қўйиладими?

Сертификат имтиҳонлари учун рўйхатдан ўтишда белгиланган лимитлар юзасидан расмий муносабат билдирилди.

Билимни баҳолаш агентлигининг қайд этишича, Вазирлар Маҳкамасининг 2026 йил 29 июлдаги 411-сон қарори билан “Умумтаълим фанларини билиш даражасини аниқлаш ва сертификат бериш тартиби тўғрисида”ги Низомга ўзгартириш ва қўшимчалар киритилган. Шунга биноан, тест синовларини ўтказиш жойи, ҳудудлар кесимида ўтириш ўринлари сони ҳисобланган.

Унга кўра, 2026 йилнинг сентябрига 125 753 та, октябрга 129 535 та, ноябрга 112 335 та ҳамда декабр ойига 128 680 та ўрин мавжуд. Бу жами 496 минг 303 нафар талабгор сертификат имтиҳонларида қатнаша олади дегани. Муносабатда ўтириш ўринлари сонининг ҳудудлар бўйича тақсимоти очиқланмаган.

“Ҳудудлар кесимида ўтириш ўринларини белгилаш - талабгорларнинг имтиҳонда иштирок этишини чеклаш, тўловларни камайтириш ёки юқори натижа кўрсатиши мумкин бўлган талабгорлар сонини сунъий равишда қисқартириш мақсадини кўзламайди.

Мазкур тартибнинг мақсади - мавжуд инфратузилма, техник воситалар, ходимлар ва назорат ресурсларидан оқилона фойдаланган ҳолда имтиҳонларни барқарор ва сифатли ташкил этиш, ҳудудлар бўйича юкламани мақбул тақсимлаш ҳамда натижаларни белгиланган муддатларда эълон қилишни таъминлашдан иборатдир”- дейилади ахборотда.

Шунингдек, муносабатда миллий сертификат имтиҳонларини ўтказиш даврийлиги оширилиши қайд этилган. Хусусан, 2026 йил сентябр-декабр ойларида математика, кимё, география, биология, физика, она тили ва адабиёт ҳамда тарих фанларидан 2 мартадан, ҳуқуқшунослик фанидан 1 марта, жами 15 та имтиҳон ўтказилиши режалаштирилган. 2025 йилнинг мос даврида бу кўрсаткич 11 та бўлган.