Истанбул-Тошкент рейси 3 соатдан ошиқроқ вақтга кечикди: Centrum Air узр сўради
Парвозга тайёргарлик вақтида самолётни қўшимча техник текшириш зарурати юзага келган. Авиакомпания компенсация чоралари, уларни олиш шартлари ва тартиби Centrum Air’нинг расмий веб-сайтида жойлаштирилгани маълум қилинди.
Centrum Air авиакомпаниясининг 17 сентябрь куни амалга оширилиши керак бўлган C6 302 Истанбул—Тошкент рейси 3 соат-у 20 дақиқага кечикди. Авиакомпания кечикиш сабабини маълум қилди.
Компания маълумотига кўра, парвозга тайёргарлик вақтида самолётни қўшимча техник текшириш зарурати юзага келган. Текширувлар тугагунига қадар рейсни кечиктиришга қарор қилинган.
Йўловчиларга рейс вақти ўзгаргани ҳақида SMS ва электрон почта орқали билдирилган. Шунингдек, маълумот авиакомпаниянинг расмий каналларида ҳам эълон қилинган.
Компания август—сентябрь ойларидаги рейсларнинг 80 фоизи жадвалга мувофиқ амалга оширилганини билдирмоқда. Қайд этилишича, айрим кечикишлар самолётлар хавфсизлиги ва техник хизмат кўрсатиш талабларига риоя қилиш билан боғлиқ.
Авиакомпания юзага келган ноқулайлик учун йўловчилардан узр сўради. Бундан ташқари, компенсация чоралари, уларни олиш шартлари ва тартиби Centrum Air’нинг расмий веб-сайтида жойлаштирилгани маълум қилинди.
