ОАВ: Ўзбекистон-Аргентина ўйини бекор қилинди
Бунга асосий сабаб сифатида жамоа юлдузи Лионел Мессининг кетиши ҳамда бунинг ортидан ҳомийлик ва тижорий шартномаларнинг қайта кўриб чиқилиши келтирилган.
Ўзбекистоннинг Аргентинага қарши ўртоқлик ўйини бекор қилинади.
Championat.asiaʼнинг “ESPN Argentina” нашрига асосланиб ёзишича, терма жамоа раҳбарияти кузги ФИФА кунлари доирасида режалаштирилган Осиё турнесидан воз кечган. Терма ўз майдонида учта назорат учрашуви ўтказишга қарор қилди.
Бундай ўзгаришларга асосий сабаб сифатида жамоа юлдузи Мессининг кетиши ҳамда бунинг ортидан ҳомийлик ва тижорий шартномаларнинг қайта кўриб чиқилиши кўрсатилмоқда.
Лионель Скалони шогирдлари сентябрь ойининг охиридан октябрь бошигача давом этадиган халқаро танаффус пайтида ўз мухлислари қаршисида майдонга тушади.
Аввалроқ Хитой билан ўйин бўйича келишувга эришилган ва ушбу тур катта молиявий даромад келтириши кутилганди. Бундан ташқари, 30 сентябр куни Ўзбекистон МТЖ билан баҳс кўзда тутилган эди.
Бироқ жамоанинг бош юлдузи сафда бўлмаслиги маълум бўлгач, Осиё мамлакатлари билан музокаралар тўхтатилди. Энди жамоа бор эътиборини ўз майдонидаги ўйинларга қаратмоқда.
