Кинотавсия: жангари, триллер ва ёқимли мелодрама

“Кинотавсия” лойиҳасининг навбатдаги сонида ўз даврида катта шуҳрат қозонган турли жанрдаги филмларни сараладик. Уларнинг орасида жангари, триллер ва ёқимли мелодрама ҳам бор.

5. “Кичкина одамлар”, 2007 (Ўзбекистон)

Режиссёр Ҳотам Файзиев томонидан “Ўзбеккино” миллий агентлигининг “Ватан” киностудиясида суратга олинган, чуқур ижтимоий ва фалсафий мавзулардаги ўзбек драмаси.

Филмда ўзбек киносининг маҳоратли актёрлари жамланган: Пўлат Саидқосимов, Алишер Узоқов, Диёс Раҳматов, Ражаб Адашев, Дилноза Кубаева, Тоҳир Саидов ва Яйра Абдуллаева.

Филм жамиятдаги “кичик” (оддий, содда) инсонларнинг ҳаёти орқали мансабпарастлик, бойликка ружу қўйиш ва оқибатсизлик каби долзарб иллатларни фош этади.

Сюжет

Филм яхлит битта сюжетдан иборат эмас, балки инсон маънавияти, виждон ва нафс курашини очиб берувчи 3 та мустақил қисқа метражли ҳикоядан (алманахдан) ташкил топган.

“Кутилмаган омад”: қишлоқлик оддий йигит Ғозибой тўсатдан лотереяга автомобил ютиб олади. Кўз очиб-юмгунча келган бойлик йигитнинг хулқини бузади. У ўз отаси ва акасига юқоридан, беписандлик билан қарай бошлайди. Бу омад уларнинг оилавий муносабатлари учун жуда қимматга тушади.Бош ролларда: Алишер Узоқов (Ғозибой) ва Пўлат Саидқосимов (Раимберди ота).

“Ҳазил”: ижарада яшовчи Содиқ кўчада маст ҳолда ухлаб ётган дўстини кўриб, унга ҳазил қилмоқчи бўлади ва устидаги тилла тақинчоқларини ечиб олади. Дўсти уйғониб, тиллаларини йўқотганини айтганида, Содиқ айбини тан олмай, уларни бирга қидиришга ваъда беради.

Содиқ тиллаларни қайтаришга улгурмай, Қамчиқ довонида ўз машинасига ўтирғизиб олган нотаниш шахслар томонидан кутилмаганда ўлдирилади. Тиллалар эса кейинчалик милиция ходимлари томонидан топилади. Бош ролда: Муҳаммаджон Раҳимов (Содиқ).

“Кичкина одамнинг “катта таниши”: узоқ йиллар қишлоқ мактабида дарс берган кекса ўқитувчи Михлибой ака нафақага чиқади. Бир куни унинг собиқ ўқувчиларидан бири – Холбой шаҳарда катта амалдор бўлиб кетгани ҳақида хабар тарқалади.

Қишлоқ аҳли Михлибой акага ўз муаммолари ёзилган хатларни ва совға-саломларни бериб, Холбойнинг олдига ёрдам сўраб жўнатишади. Аммо катта курсига ўтирган шогирд ўз устозини танишни ҳам хоҳламайди, уни рад этади. Бош ролларда: Диёс Раҳматов (Михлибой ака), Матёқуб Матчонов (Холбой).

4. “Питер ФМ”, 2006 (Россия)

Режиссёр Оксана Бичкова томонидан суратга олинган, Санкт-Петербург шаҳрининг гўзал манзаралари ва романтик муҳити тасвирланган Россия лирик комедияси ва мелодрамаси. Филм чиққан даврида ёшларнинг севимли киносига айланиб, ўзига хос маданий рамз даражасига кўтарилган.

Кинодаги “Ҳаммаси яхши бўлади. Мен суриштириб кўрдим” («Все будет хорошо. Я узнавала”) ибораси халқ орасида жуда машҳур мемга айланган.

Санкт-Петербург шаҳри филмда шунчаки декорация эмас, балки асосий қаҳрамонлардан бири сифатида гавдаланади. Унда кўчалар, томлар, Невский проспекти ва дарё бўйлари жуда гўзал тасвирланган.

Филм мусиқалари ҳам катта муваффақият қозонган. Картинада “Город 312” (Вне зоны доступа), “Krec” (Нежность) ва “Маркшейдер Кунст” гуруҳларининг қўшиқлари янграйди.

Машҳур актёрлар: эпизодларда Владимир Машков, Андрей Краско ва Александр Баширов каби таниқли юлдузлар ҳам кўриниш берган.

Сюжет

Филм бир-бирини умуман танимайдиган икки ёш инсоннинг тақдири ҳақида: Маша (Екатерина Федулова) – машҳур радиостанцияда диджей бўлиб ишлайди. У собиқ синфдоши Костяга турмушга чиқиш арафасида, аммо юраги тубида бу қарори тўғрилигига шубҳа қилади.

Максим (Евгений Циганов) – истеъдодли ёш архитектор. У халқаро танловда ғолиб чиқиб, Германияга ишга таклиф қилинган, аммо шаҳарни ва собиқ севгилисини ташлаб кетишга иккиланади.

Кунлардан бир кун Маша кўчада уяли телефонини тушириб қўяди, уни Максим топиб олади. Улар телефон орқали гаплаша бошлайдилар ва бир-бирларига боғланиб қолишади. Лекин тақдир ёки шаҳарнинг катталиги уларнинг кўришишига қайта-қайта халақит беради.

3. “Балерина”, 2025 (АҚШ)

Мазкур филм машҳур “Жон Уик” франшизасининг илк тўлиқ метражли спин-оффи (ёндош филми) ҳисобланади. Филм дунё кинотеатрларида ва Ўзбекистон катта экранларида 2025 йилнинг июн ойида намойиш этилган.

Режиссёр: Лен Уайзман. Бош ролларда: Ана де Армас, Киану Ривз, Анжелика Хюстон, Гэбриел Бирн, Лэнс Реддик, Каталина Сандино Морено, Норман Ридус, Ян Макшейн.

Филмда Жон Уик ролида Киану Ривзнинг ўзи ҳам кўриниш беради ва у бош қаҳрамон Евага хавфли вазиятларда кўмаклашади. Кино “Жон Уик” услубидаги ўта шиддатли ва визуал гўзал жанг саҳналари (Ган-фу) билан ажралиб туради.

Филмда Ню-Йоркдаги “Континентал” меҳмонхонаси бошқарувчиси Уинстон (Ян Макшейн) ва Харон (марҳум актёр Лэнс Реддикнинг сўнгги ролларидан бири) ҳам иштирок этган.

Сюжет

Воқеалар хронологик жиҳатдан “Жон Уик-3” ва “Жон Уик-4” филмлари оралиғида бўлиб ўтади. Болалигида отасининг ўлдирилишига гувоҳ бўлган Ева қасос ўтида ёнади. У профессионал балет мактаби ниқоби остидаги махфий қотиллик академиясида таҳсил олиб, ўз оиласини йўқ қилган қудратли кланга қарши уруш очади.

2. “Қил устида”, 1997 (АҚШ)

Режиссёр Ли Тамахори томонидан суратга олинган мазкур саргузашт триллерда бош ролларни Энтони Хопкинс ва Алек Болдуин ижро этган.

Чарлзнинг машҳур ибораси бор: “Кўпчилик ўрмонда бахтсиз ҳодиса туфайли эмас, балки қўрқув ва умидсизликдан вафот этади”.

Сюжет

Миллиардер Чарлз Морс (Хопкинс), мода фотографи Роберт Грин (Болдуин) ва унинг ёрдамчиси Стивен кичик самолётда Алясканинг кимсасиз, қаҳратон ўрмонларига қулашади. Самолёт учувчиси ҳалок бўлади.

Шаҳар ҳаётига ўрганган қаҳрамонлар ёввойи табиат қўйнида, ҳеч қандай қурол ва озиқ-овқатсиз қолишади. Уларни қадамба-қадам таъқиб қилиб юрувчи хавфли одамхўр айиқ эса вазиятни янада оғирлаштиради.

Тез орада Чарлз хотини Элли ва фотограф Роберт ўртасида яширин ишқий муносабатлар борлигини тушуниб етади. Энди улар нафақат айиқдан омон қолишлари, балки бир-бирларига бўлган ишончсизлик ва адоватни ҳам енгишлари керак бўлади.

1. “Интерстеллар”, 2014 (АҚШ)

Режиссёр Кристофер Нолан томонидан суратга олинган, илмий-фантастика жанридаги дунё киносининг ҳақиқий шоҳасари. Филм нафақат визуал эффектлари ва мусиқаси, балки коинот қонуниятларининг илмий жиҳатдан аниқ тасвирлангани билан ҳам ажралиб туради.

Филм сценарийси устида машҳур физик-назариётчи, Нобел мукофоти совриндори Кип Торн ишлаган. Кинодаги қора туйнук тасвири фандаги энг аниқ визуал модел ҳисобланади.

Филм 2015 йилда “Энг яхши визуал эффектлар” номинациясида Оскар мукофотини қўлга киритган.

Бош ролларда: Мэттю Макконахи, Энн Хэтэуэй, Жессика Честейн ва Майкл Кейн.

Сюжет

Яқин келажакда Ер сайёраси экологик инқироз (қурғоқчилик, чанг бўронлари ва ўсимликлар касаллиги) туфайли ҳалокат ёқасига келиб қолади. Инсоният очликдан қирилиш хавфи остида яшайди.

Собиқ НАСА учувчиси ва ҳозирда фермер Купер тасодифан собиқ ишхонасининг махфий базасини топиб олади. Олимлар Сатурн сайёраси яқинида пайдо бўлган “қора туйнук” орқали бошқа галактикадан инсоният яшаши учун мос янги сайёра излашаётган бўлади.

Купер ўз фарзандларини Ерда қолдириб, коинотга йўл олади. Бироқ кучли гравитация туфайли фазодаги бир неча соат Ердаги ўнлаб йилларга тенг ўтади. Бу эса ота ва қиз ўртасидаги вақт аро энг таъсирли драманинг бошланишига сабаб бўлади.