Совуқ, музлаган қуроллар ва жароҳатлар: қозоқ актёри "Амир Темур" филми ҳақида гапирди

Қозоғистон киноси юлдузи Санжар Мади буюк Соҳибқирон Амир Темур ҳаётига бағишланган халқаро лойиҳадаги иштироки ва суратга олиш ишларининг парда ортидаги сирлари билан ўртоқлашди.

Суратга олиш ишларининг асосий қисми қиш фаслида, очиқ дашт кенгликларида бўлиб ўтган.

Санжар Мадининг таъкидлашича, ҳаво ҳарорати ва доимий шамоллар ишни ниҳоятда мураккаблаштирган:совут ва қуроллар музлаб қолган, уларни ушлаш ва уларда ҳаракат қилиш азобга айланган.

Совуқ шу даражада кучли бўлганки, актёрлар баъзан жағлари музлаб қолганидан сўзларни талаффуз қилишга қийналишган.

​Ҳақиқий ҳиссиётлар: Мадининг айтишича, кадрдаги совуқдан қалтираш ёки қийналиш саҳналарини ўйнаш шарт бўлмаган — буларнинг барчаси табиий эди.

Тарихий фильмда роль ижро этиш актёрдан профессионал каскадёрлик маҳоратини талаб қилган. Актёрлар кунлаб эгар устида вақт ўтказишган. Бу нафақат чарчоқ, балки доимий жисмоний оғриқларни ҳам келтириб чиқарди.

Ўша даврнинг оғир қиличлари ва совутлари билан жанг саҳналарида қатнашиш учун Санжар Мади бир неча ой давомида махсус машқлар қилган.

"Суратга олиш давомида кичик жароҳатлар, кўкаришлар ва мушак оғриқлари оддий ҳолга айланган, аммо бу жараённинг ажралмас қисми сифатида қабул қилинди", дейди актёр.

Интервьюда актёр каскадёрлар гуруҳининг (Nomad Stunts) хизматини алоҳида эътироф этди. Уларнинг ёрдами билан жанг саҳналари Голливуд стандартлари даражасида, ҳеч қандай ортиқча эффектларсиз, имкон қадар "жонли" ижро этилган.

"Амир Темур ҳақидаги филмда нега ўзбек актёрлари кам?" деган саволга актёр қуйидагича жавоб олганини айтади:

"Мен бу саволни продюсерга суратга олиш жараёнида бердим. Ўзбекистон буюртма қилган фильмда нега маҳаллий актёрлар камлиги мени чин дилдан қизиқтирди. Мен аниқ жавоб олдим: уларнинг кино саноати ҳали ҳам яхши рол ўйнай оладиган ва турли тилларда гапирадиган бундай даражадаги актёрларни тақдим эта олмайди".