Қорақалпоғистон мамлакат медиа ҳаётининг энг қайноқ нуқтасига айланди — “Медиа ҳафталик” якунлари
Оммавий ахборот воситалари учун контент тайёрлаш маркази ҳамкор ташкилотлар билан биргаликда Ўзбекистонда йилнинг энг йирик медиа лойиҳаларидан бири — “Медиа ҳафталик”ни йўлга қўйди. Лойиҳа 30 мартдан 3 апрелгача Қорақалпоғистонда юқори атмосферада ўтказилди.
Анъанавий қуруқ академик маърузалардан воз кечилиб, жонли амалиётга асосланган ушбу ташаббус сўнгги беш кун ичида Қорақалпоғистон Республикасини мамлакат медиа ҳаётининг энг қайноқ нуқтасига айлантирди.
Лойиҳа кутилганидан анча кенг қамров олди: ҳудудда 700 дан ортиқ медиа вакиллари — журналистлар, блогерлар, SMM мутахассислари ва ёш контент яратувчилар бир майдонда жамланди. Бу оддий ўқув эмас, балки медиага янгича қарашни шакллантирган амалий тажриба мактабига айланди.
Ҳафталик миллий медиада янги импульс берди: иштирокчилар сунъий интеллектдан фойдаланиш, фактчекинг, креатив контент ишлаб чиқиш ва ахборот хуружларига қарши туриш каби кўникмаларни амалда ўзлаштирди.
Энг муҳими, беш кунлик мулоқот давлат идоралари ва медиа ўртасидаги “кўринмас девор”ни бузиб, ўзаро ишонч ва ҳамкорликка асосланган янги медиа муҳитини шакллантирди.
Дастур беш йўналишда олиб борилди: журналистика, телевидение, ахборот хизматлари, SMM ва блогинг. Унда AI, кризис-коммуникация, сторителлинг, монтаж ва алгоритмлар билан ишлаш каби энг долзарб йўналишлар қамраб олинди.
Шу билан бирга, ҳафталик доирасида минглаб ёшларни қамраб олган SMM ва мобилография курслари натижалари тақдим қилиниб, кўплаб иштирокчиларга сертификат ва амалий имкониятлар берилди.
Контент марказ очилганда кўпчиликда бир савол бор эди: “Яна битта идорами ёки ростдан ҳам иш қиладими?” Жавоб узоқ куттирмади. Қисқа вақт ичида марказ ортиқча пиарсиз, баландпарвоз гапларсиз жуда тез “иш режими”га шўнғиб кетди.
Бугун у қоғозда эмас, амалда кўриниб турган структурага айланди: телевидение, радио, сайтлар билан яқиндан ҳамкорликда ишлаяпти. Тарихий манзил — Алишер Навоий кўчаси, 30-уйда жойлашган Контент марказининг биноси таъмирланиб, ўзига хос жозибадор, ёруғ ва шинам, медиа вакиллари учун очиқ ва қулай масканга айлантирилди. Марказ соҳа вакилларини бир жойга тўплаяпти. Бу бинога таҳририятлар “жой излаб” келяпти. Ҳозирнинг ўзида 10 дан ортиқ сайт шу ерда фаолият юритмоқда.
Энг катта ўзгариш эса бошқа жойда: бу ерда ҳеч кимни “сен журналистсан”, “сен блогерсан”, “сен вайнерсан”, “сен газетачисан” деб ажратишмади — барчага бирдек яқинлик, бир хил имконият ва умумий майдон яратилди. Бу эса медиа ичидаги парчаланишни секин-аста йўқотяпти.
“Медиа ҳафталик” шу ёндашувнинг энг ёрқин намунаси бўлди. Турли соҳа вакиллари бир жойда, бир форматда, қуруқ гап эмас, реал иш устида ишлади. Қорақалпоғистондаги босқич эса шунчаки тадбир эмас, сигнал бўлди: шовқин қилмасдан ҳам катта ишларни қилиш мумкин. Контент маркази амалда буни намоён қилди.
