Японияда февралда муддатидан олдин сайловлар ўтказилиши мумкин

Япония февралда муддатидан олдин сайлов ўтказиши мумкин.

Қарор бош вазир Санае Такаичининг рекорд даражадаги рейтинги фонида ва иқтисодий ҳамда ташқи сиёсий босимлар кучайиб бораётган бир пайтда муҳокама қилинмоқда.

Ҳафта охирида Япония ОАВларида чиққан хабарларга кўра, Либерал демократик партия ҳукмрон коалицияни барқарорлаштириш мақсадида Бош вазир Санае Такаичининг юқори рейтингларидан фойдаланмоқчи.

NHK маълум қилишича, Япония Ички ишлар ва коммуникациялар вазирлиги ҳар бир сайлов комиссияларига эҳтимолий умумий сайловларга тайёргарлик кўриш бўйича кўрсатма берган.

Nikkei ўтказган сўровга кўра, Такаичининг маъқулланиш даражаси тарихий 75 фоизга етган бўлиб, кетма-кет учинчи ой 70 фоиздан юқори кўрсаткич сақланиб қолмоқда.

Бу юқори рейтинглар Токио ва Пекин ўртасида юзага келган дипломатик кескинлик фонида қайд этилмоқда. Хусусан, Такаичининг ноябр ойида Хитойнинг Тайванга қарши эҳтимолий ҳарбий ҳаракати Япония мудофаа кучларининг аралашувига сабаб бўлиши мумкинлиги ҳақидаги баёнотлари бунга туртки бўлган.

Агар феврал ойида муддатидан олдин сайлов эълон қилинса, бу Такаичининг бош вазир сифатидаги фаолиятига атиги тўрт ой тўлган пайтга тўғри келади. Шунингдек, бу ЛДПнинг кичик коалиция ҳамкори — Япония Инновациялар партияси (ЖИП) билан биргаликда қатнашадиган илк сайлови бўлади.

ЛДП ва ЖИП қуйи палатада 230 ўринга эга. Уч нафар мустақил депутат қўшилгач, ҳукмрон коалиция 465 ўринли палатада озгина устунликни қўлга киритган.

Бироқ коалиция Япония парламентининг юқори палатасида озчиликни ташкил этади — 250 ўриндан атиги 119 таси уларга тегишли.

Мухолифат ҳукумат алмашувини ваъда қилмоқда.

Алоҳида равишда, Япония Конституцион-демократик партияси (CДП) етакчиси Ёсиҳико Нода NHKʼга берган интервьюсида ҳукмрон коалицияни ҳокимиятдан четлатишга ваъда берди. У, шунингдек, ЛДПнинг собиқ коалиция ҳамкори Комеито билан иттифоқ тузилиши эҳтимолини ҳам тилга олди.

Япониядаги энг йирик мухолифат партияси бўлган CДП қуйи палатада 148 ўринга эга, Комеито эса 24 ўринни назорат қилади.

Лавозимга киришганидан буён Такаичи заифлашиб бораётган иена, юқори инфляция ва суст иқтисодиёт билан юзлашиб келмоқда.

Иена ҳозирда долларга нисбатан бир йил ичидаги энг паст даражага тушиб, душанба куни 1 доллар учун 158,19 иенани ташкил этди. Японияда инфляция Япония Марказий банки белгилаган мақсаддан кетма-кет 44 ой давомида юқори бўлиб келмоқда.

Учинчи чорак бўйича қайта кўриб чиқилган ЯИМ маълумотларига кўра, Япония иқтисодиёти дастлабки кўрсаткичларга қараганда кўпроқ қисқарган: чораклар кесимида 0,6 фоизга, йиллик ҳисобда эса 2,3 фоизга камайган.