Индонезия ва Малайзия Grok сунъий интеллект тизимини блоклади
Бу аёллар ва вояга етмаганлар иштирокидаги сохта порнографик контент яратилиши ва тарқалиши бўйича хавотирлар билан боғлиқ.
Индонезия ва Малайзия Grok сунъий интеллект тизимини блоклади.
Аёллар ва вояга етмаганлар иштирокидаги сохта порнографик контент яратилишидан хавотир билдирган Индонезия ва Малайзия расмийлари Grok сунъий интеллект тизимига киришни вақтинча тўхтатди.
Бу чоралар реалистик тасвирлар, овоз ва матн яратишга қодир генератив сунъий интеллект воситалари бўйича бутун дунёда кучайиб бораётган хавотирларни акс эттиради. Чунки мавжуд ҳимоя механизмлари уларнинг суиистеъмол қилинишининг олдини олишга етарли даражада қодир эмас.
Илон Маскга тегишли Х ижтимоий тармоғи орқали фойдаланиладиган Grok чат-боти аёлларни бикини ёки жинсий мазмундаги ҳолатларда тасвирлаш, шунингдек болалар иштирокидаги образларни яратиш каби манипуляцияланган расмлар яратгани учун кенг танқидга учради.
Жануби-Шарқий Осиёдаги икки давлат мавжуд назорат чораларига қарамай, аёллар ва вояга етмаганлар иштирокидаги сохта порнографик контент яратилиши ва тарқалишининг олди олинмаётганини маълум қилди. Индонезия ҳукумати 10 январ куни Grokʼга киришни вақтинча блоклади, ундан кейин якшанба куни Малайзия ҳам худди шундай қарор қабул қилди.
“Розиликсиз яратилган жинсий дипфейклар ҳукумат томонидан инсон ҳуқуқлари, қадр-қиммат ва фуқароларнинг рақамли макондаги хавфсизлигига жиддий тажовуз сифатида баҳоланади”, — деди Индонезия Алоқа ва рақамли масалалар вазири Меутя Ҳафид ўз баёнотида.
Вазирликнинг таъкидлашича, ушбу чора сунъий интеллект ёрдамида яратилган сохта порнографик контентдан аёллар, болалар ва кенг жамоатчиликни ҳимоя қилишга қаратилган.
Куала-Лумпурда Малайзия Алоқа ва мультимедиа комиссияси кеча Grokʼга вақтинчалик чеклов жорий қилди.
Регуляторнинг билдиришича, шу ой Х Corp. ва xAIʼга кучлироқ ҳимоя механизмларини жорий этиш талаби билан юборилган огоҳлантиришларга асосан фойдаланувчи шикоятларига таянилган жавоблар олинган.
“Чеклов ҳуқуқий ва тартибга солиш жараёнлари давом этаётган бир пайтда олдини олувчи ва мутаносиб чора сифатида жорий этилди”, — дейилади баёнотда. Самарали ҳимоя воситалари жорий этилмагунча Grokʼга кириш ёпиқ қолиши қўшимча қилинди.
2023 йилда ишга туширилган Grok Х платформасида бепул фойдаланиш учун очиқ. Фойдаланувчилар ундан саволлар беришлари, шунингдек ўзлари яратган постларни ёки бошқа фойдаланувчиларнинг постларига ёзилган жавобларни белгилашлари мумкин.
Ўтган ёзда компания Grok Imagine номли тасвир генераторини ишга туширди, унда катталар учун контент яратишга имкон берувчи “spicy mode” ҳам мавжуд эди.
Жануби-Шарқий Осиёдаги чекловлар Grok атрофидаги танқидлар Европа Иттифоқи, Буюк Британия, Ҳиндистон ва Францияда ҳам кучайиб бораётган бир пайтга тўғри келди.
Ўтган ҳафта Grok дипфейклар сабаб юзага келган глобал норозиликдан сўнг тасвир яратиш ва таҳрирлаш функцияларини фақат пуллик фойдаланувчилар билан чеклади. Бироқ танқидчилар бу муаммони тўлиқ ҳал қилмаганини таъкидлашмоқда.