GM электромобиллар бўйича йирик инқирозга дуч келди

GM электромобиллар бўйича инқирозга юз тутди: компания 6 млрд долларлик харажатларга дуч келади.

АҚШда электромобиллар учун солиқ имтиёзлари бекор қилиниши ва экологик талаблар юмшатилиши фонида General Motors электромобил савдосининг пасайиши сабабли қарийб 6 миллиард долларлик молиявий йўқотишларни қайд этишини маълум қилди.

General Motors АҚШда электромобилларни харид қилиш учун бериладиган солиқ имтиёзлари қисқартирилгани ва автомобиллар учун экологик чиқиндилар бўйича талаблар юмшатилгани ортидан электромобил савдолари секинлашгани сабабли қарийб 6 миллиард долларлик харажатларга дуч келади.

Жума куни компания акциялари қарийб 3 фоизга пасайди.

Тўртинчи чоракда қайд этиладиган ушбу харажатлар октябр ойида эълон қилинган аввалги чоракдаги 1,6 миллиард долларлик харажатлардан сўнг юзага келмоқда. Бу ҳолат автомобил ишлаб чиқарувчиларни автопаркни электрлаштириш бўйича катта режаларга қайта баҳо беришга мажбур қилмоқда.

Электромобиллар учун солиқ кредити сентябр ойида якунланди. Ушбу имтиёз янги электромобиллар учун 7 500 долларни, ишлатилган электромобиллар учун эса 4 000 долларгача маблағни ташкил этган.

Ички ёнув двигателларидан воз кечиш бўйича АҚШ автомобил ишлаб чиқарувчилари орасида энг дадил режаларни илгари сурган GM 8 январ куни кечқурун Қимматли қоғозлар ва биржалар комиссиясига (СЕC) тақдим этган ҳужжатида 6 миллиард долларлик харажатлар таркибига қарийб 1,8 миллиард долларлик нақд пульсиз активлар қийматини камайтириш ва бошқа нақд пульсиз харажатлар, шунингдек, етказиб берувчилар билан тижорий келишувлар, шартномаларни бекор қилиш тўловлари ва тахминан 4,2 миллиард долларлик бошқа харажатлар киришини маълум қилди.

Электромобиллар АҚШ автомобил саноатининг келажаги сифатида кўрилиб келган. GM 2020 йилда пандемиядан олдинги режаларга нисбатан 35 фоизга кўп бўлган ҳолда, кейинги беш йил ичида электромобилларга 27 миллиард доллар сармоя киритишини эълон қилган эди.

Компания 2030 йилга бориб Шимолий Америка ва Хитойдаги заводларининг ярмидан кўпи электромобил ишлаб чиқариш имкониятига эга бўлишини кутган. Шунингдек, 2025 йилгача электромобилларни қувватлаш инфратузилмасига сармояни қарийб 750 миллион долларга ошириш мажбуриятини олган эди.

GM 2035 йилга бориб ишлаб чиқариладиган автомобилларнинг аксариятини электрлаштиришни, ундан беш йил ўтиб эса компанияни тўлиқ углерод нейтрал ҳолатга келтиришни мақсад қилган.

Бироқ бу режалар Байден ва Трамп маъмуриятлари ўртасидаги иқтисодий ва экологик сиёсатдаги кескин фарқлар сабаб жиддий зарба олди.

Сўнгги йилларда Хитой электромобил технологиялари бўйича глобал етакчига айланди: мамлакатда миллионлаб автомобильлар ишлаб чиқарилмоқда ва кенг кўламли қувватлаш тармоғи шакллантирилмоқда.

Шу ой бошида Тесла дунёдаги энг йирик электромобил ишлаб чиқарувчи мақомидан айрилди. Уни ўтган йили 2,26 миллион электромобил ишлаб чиқарган Хитойнинг BYD компанияси ортда қолдирди.