Мадуро Беларусдан сиёсий бошпана олиши мумкин

АҚШ президенти Доналд Трамп босими ортар экан, Путин ва Лукашенко Венесулэла раҳбари Мадурони қўллаб-қувватлашга ўтди.

Трамп маъмуриятининг кескин босимлари фонида Путин Мадурони қўллашини яна тасдиқлади, Беларус эса сиёсий бошпана бериш эҳтимоли ҳақида билвосита ишора қилди.

Мадуронинг 21 ноябр куни Трампга қилган телефон қўнғироғида у Венесуэлани тарк этишга тайёрлигини айтган, бироқ бунинг учун ўзи ва оиласига тўлиқ ҳуқуқий амнистия берилиши кераклигини билдирган.

Беларус президенти Александр Лукашенко эса 17 кун ичида иккинчи бор Венесуэланинг Москвадаги элчиси Хесус Рафаэл Саласар Веласкес билан учрашди.

Беларус давлат ахборот агентлиги Белтанинг ёзишича, Лукашенко 25 ноябрь куни элчига Беларус эшиклари Мадуро учун ҳар доим очиқлигини айтиб, энди унинг ташриф буюриш вақти келганини билдирган эди.

Reuters нашри ушбу учрашувларнинг аҳамияти ва агар Мадуро истеъфога чиқса, Беларус уни бошпана билан таъминлашга тайёр-тайёр эмаслиги ҳақида Лукашенко идорасидан изоҳ сўради. Жавоб берилмади.

Кремлнинг баёнотига кўра, Россия президенти Владимир Путин 11 декабрь куни Венесуэла раҳбарига қилган қўнғироғида "ташқи босим кучайиб бораётган бир пайтда миллий манфаатлар ва суверенитетни ҳимоя қилишга қаратилган Мадуро ҳукуматининг сиёсатини қўллаб-қувватлаши"ни яна бир бор тасдиқлаган.

АҚШ эса Кариб бўйидаги ҳарбий кучларини кескин кўпайтирди.

Трамп маъмурияти 2013 йилдан бери ҳокимиятда бўлган Мадурони Венесуэланинг қонуний президенти сифатида тан олмайди. Мадуро ўтган йили АҚШ ва Ғарб давлатлари “сохталаштирилган” деб баҳолаган сайловда ғалаба қилганини даъво қилган. Мустақил кузатувчиларнинг айтишича, аслида мухолифат катта устунлик билан ғолиб бўлган.

Сўнгги ойлар ичида Трамп Венесуэлага босимни янада кучайтириб, Кариб денгизида йирик ҳарбий куч йиғмоқда.

Politico'га берган интервьюсида Трамп Мадуронинг “кунлари чекланганлигини” айтди, бироқ АҚШ қўшинларини Венесуэлага юбориш-юбормаслиги ҳақида аниқ жавоб бермади.

Россия Ташқи ишлар вазирлиги вакили Мария Захарова “Оқ уй бутун Ғарбий ярим шарда кутилмаган оқибатларга олиб келиши мумкин бўлган тўлиқ миқёсли можарони тўхтата олади деган умиддамиз”, дея фикр билдирди.